नसरापुरात मारहाणप्रकरणी सात जणांवर गुन्हा दाखल

नसरापूर, ता. २६ ः मित्राला शिव्या का देतो, असे विचारल्याने सात जणांच्या टोळक्याने मिळून कोयत्याने दहशत माजवत चौघांना हॉकी स्टीकने मारहाण केल्याची तक्रार राजगड पोलिस ठाण्यात दाखल झाली आहे. पोलिसांनी याप्रकरणी सात जणांवर गुन्हा दाखल केला आहे.
याप्रकरणी अनिकेत भगवान देवकर (वय २६, रा. उंबरे, ता. भोर) याने फिर्याद दिली असून, त्यानुसार पोलिसांनी अक्षय वाल्हेकर, सँडी वाल्हेकर, दीपक इंगूळकर (तिघेही रा. कामथडी, ता. भोर), चिवड्या खेडकर (रा. नसरापूर), यश भिलारे, गणेश धाडवे (रा. सारोळा), घनश्याम कोंडे (रा. केळवडे) यांच्या विरोधात गुन्हा दाखल केला आहे.
पोलिसांनी दिलेल्या माहितीनुसार, रविवारी (ता. २२) रात्री दहा वाजण्याच्या सुमारास फिर्यादी अनिकेत देवकर त्याचा मित्र अजय गोकुळ लिमण (रा. पारवडी, ता. भोर) व अमोल भरत खोमणे (रा. धांगवडी, ता. भोर) हे तिघे नसरापूर चेलाडी (ता. भोर) येथील एका हॉटेलबाहेर थांबले असताना तिथे अक्षय वाल्हेकर, सँडी वाल्हेकर, चिवड्या खेडकर व यश भिलारे हे चौघे काळ्या रंगाच्या क्रेटामधून (क्र. एम एच १२ व्ही. क्यू. ९९२२) तिथे आले व फिर्यादीचा मित्र खोमणे यास शिव्या देऊ लागले. त्यावेळी फिर्यादी देवकर याने माझ्या मित्राला का शिव्या देता, असे विचारताच वाल्हेकर याने गाडीमधून उतरून अनिकेत याच्या डोक्यात बियरची बाटली मारली व हातातील हाँकी स्टीकने फिर्यादीसह त्याच्या दोन मित्रांना मारहाण केली. यावेळी फिर्यादीचा भाऊ ओंकार देवकर तिथे आला. त्याचवेळी काळ्या रंगाच्या दुसऱ्या मोटारीमधून गणेश धाडवे, घनश्याम कोंडे व दीपक इंगूळकर हे तिघे तिथे आले. त्यांनी हातात कोयता घेऊन ओंकार यास तुझा इथे येण्याचा काय संबंध म्हणून तुम्हाला लय माज आलाय का? असे म्हणून सर्वांनी लाथाबुक्यांनी व हॉकी स्टीकने मारहाण करत जखमी केले व यांच्यावर कोयता टाका, यांना संपवायचे आहे, असे म्हणत अक्षय वाल्हेकर याने मारहाण केली.
या गुन्ह्यातील सहा जणांना अटक करून न्यायालयासमोर हजर केले असता, त्यांना शुक्रवारपर्यंत (ता. २७) पोलिस कोठडी सुनावण्यात आली आहे. उर्वरित यश भिलारे याचा तपास करण्यात येत आहे. गुन्ह्यादरम्यान वापरण्यात आलेली वाहनेही जप्त केली आहेत. पुढील तपास फौजदार अजित पाटील करत आहेत.