मंगल कार्यालयातून पावणेतीन लाखांचा ऐवज लंपास

खेड शिवापूर, ता. ७ : खेड शिवापूर (ता. हवेली) येथील मंगलकार्यालयातील लग्नसमांरभाच्या धामधुमीत एका महिलेची पर्स चोरून त्यातील दागिने व रोख रक्कम मिळून पावणेतीन लाखाचा ऐवज लंपास करण्यात आला आहे. याप्रकरणी राजगड पोलिस ठाण्यात अज्ञात चोरट्याविरोधात गुन्हा दाखल करण्यात आला आहे.
कविता विरभद्र अंबोले (वय ४९ रा. नांदेड सिटी, पुणे) यांनी तक्रार दाखल केली आहे. याबाबतची माहिती अशी की, सोमवारी (ता. ३) शिवापूर महामार्गालगत असलेल्या मंगलकार्यालयात अंबोले यांच्या मुलीच्या लग्नाचे विधी सुरू असताना दुपारी २. २१ ते २.३० या फक्त नऊ मिनिटाच्या कालावधीत कविता यांनी त्यांची पर्स वधू-वराच्या सोफ्यावर ठेवून विधी करत असताना स्टेजवरील गर्दीचा फायदा घेऊन चोरट्याने पर्स लंपास केली. या पर्स मध्ये ६० हजार रुपयांची एक तोळा वजनाची सोनसाखळी, १२ हजार रुपयांचे सोन्याचे कानातील झुबे, १ लाख ५० हजार रुपयांचे हिऱ्यांच्या खड्याचे पेंडंट, ५ हजार रुपये किमतीची चांदीची श्रीमाळ व कृष्णाची मूर्ती, ३ हजार रुपयांचा मोबाइल व ४० हजार रुपयांची रोख रक्कम असा मिळून २ लाख ७५ हजार रुपयांचा ऐवज चोरट्यांनी पर्स सहित चोरुन नेला आहे. याबाबत सर्व नातेवाइकांकडे चौकशी करून कविता अंबोले यांनी गुरुवारी (ता.६) राजगड पोलिस ठाण्यात अज्ञात चोरट्यांच्या विरोधात तक्रार दाखल केली आहे. पुढील तपास महिला पोलिस हवालदार प्रमिला निकम पुढील तपास करत आहेत.