मोटारचालक डॉक्टरला दुचाकीचालकाची मारहाण

नसरापूर, ता. १९ : शिवरे (ता. भोर) येथे महामार्गावर मोटारीचा दुचाकीला धक्का बसल्याने दुचाकी चालकाने मोटार चालकास गंभीर मारहाण केली. याप्रकरणी राजगड पोलिस ठाण्यात गुन्हा दाखल केला आहे.
याबाबत मोटार चालक भूलतज्ज्ञ डॉ. शिवाजी पांडुरंग कुटे (वय ३५, रा. बिबवेवाडी, पुणे) यांनी राजगड पोलिस ठाण्यात दुचाकी चालक योगेश कोंडे (रा. खेड शिवापूर) यांच्या विरोधात तक्रार दाखल केली आहे. त्यानुसार डॉ. कुटे यांच्या मोटारीने सोमवारी (ता. १५) सकाळी साडेआठ वाजण्याच्या सुमारास शिवरे येथे महामार्गावर पुणे- सातारा लेनवर उड्डाणपूल पार केला. त्यावेळी त्यांच्या पुढे चालणाऱ्या मोटारसायकलचा (क्र. एम.एच. १२ डब्ल्यू.जी. १९१५) मागून धक्का लागला. याचा राग येऊन मोटारसायकल चालक योगेश कोंडे यांनी डॉ. कुटे यांना शिवीगाळ करत हाताने मारहाण केली. त्यामध्ये त्यांच्या डोळ्यास व नाकास गंभीर दुखापत झाली. त्यांनी दवाखान्यात जाऊन बुधवारी (ता. १७) याबाबत राजगड पोलिस ठाण्यात तक्रार दाखल केली. याबाबत पोलिस हवालदार किरण बर्कले पुढील तपास करत आहेत.