न्हावऱ्यात पारंपारिक पद्धतीने तुळशी विवाह

न्हावरे, ता. १२ : न्हावरे (ता. शिरूर) येथील ग्रामस्थांच्यावतीने ग्रामदैवत श्री मल्लिकार्जुन मंदिरात हरिनामाच्या गजरात व टाळ मृदंगाच्या तालावर पारंपरिक पद्धतीने तुळशी विवाह सोहळा उत्साहात पार पडला.
कार्तिकी एकादशीनिमित्त श्री मल्लिकार्जुन मंदिरात पहाटे सरपंच कमल कोकडे व माजी उपसरपंच जयवंतराव कोकडे यांच्या हस्ते श्रींचा महाभिषेक, विठ्ठलाची महापूजा पार पडली. त्यानंतर श्रीकृष्ण व तुळशी विवाहाचे आयोजन केले होते. पूजेचे पौरोहित्य प्रकाश रिसबूड यांनी केले होते. या विवाह सोहळ्यासाठी मल्लिकार्जुन भजनी मंडळ व ग्रामस्थ व परिसरातून भक्तजन उपस्थित होते. सायंकाळी श्यामकांत महाराज साठे यांच्या प्रवचनाचे आयोजन केले होते. त्यानंतर श्री मल्लिकार्जुन भजनी मंडळाचा हरिपाठ, सुश्राव्य संगीत भजन व पहाटे काकडा भजनाचे आयोजन केले होते. दिवसभर भक्तांनी दर्शनासाठी गर्दी केली होती. उपस्थित भक्तजनांना फराळाचे वाटप करण्यात आले.

न्हावरे (ता. शिरूर) : ग्रामदैवत श्री मल्लिकार्जुन मंदिरात तुळशी विवाह सोहळा.