आंबळे परिसरात आढळले दोन बछडे

न्हावरे, ता. ३ ः आंबळे (ता. शिरूर) येथील शेतात ऊसतोड सुरू असताना बिबट्याचे दोन बछडे आढळून आले. वनविभागाच्या वतीने शेतातील बिबट्याच्या दोन्ही बछड्यांना ताब्यात घेण्यात आले आहे.
येथील प्रकाश बेंद्रे यांच्या शेतात ऊसतोड चालू असताना ऊसतोड कामगारांना उसाच्या फडात दोन बिबट्याचे बछडे आढळून आले. याबाबतची माहिती वनपरिक्षेत्र अधिकारी निळकंठ गव्हाणे व वनपरिमंडल अधिकारी भानुदास शिंदे यांना मिळताच नियतक्षेत्र वनअधिकारी गणेश झिरपे, वनविभाग रेस्क्यू पथकातील सदस्य शरद गदादे, सुधीर शितोळे, शेरखान शेख, गणेश टिळेकर, संदीप गव्हाणे, अमोल कुसाळकर, शुभांगी टिळेकर यांनी या ठिकाणी धाव घेत प्रकाश बेंद्रे, मुकुंद भिवरे यांसह आदींच्या उपस्थितीत बिबट्याच्या दोन्ही बछड्यांना ताब्यात घेतले. बिबट्याच्या बछड्यांना त्यांच्या आईच्या पुनर्मिलनासाठी शेतात सुरक्षित ठेवले असून, परिसरात शेतकऱ्यांनी शेतात काम करताना काळजी घ्यावी व रात्रीच्या वेळी शेतात फिरू नये, असे आवाहन वनविभागाच्या वतीने करण्यात आले आहे.

02486