पुंगळ्या काढलेल्या दुचाकींवर कारवाई करण्याची मागणी

नीरा नरसिंहपूर, ता. १६ : सायलेन्सरच्या पुंगळ्या काढलेल्या गाड्या, बुलेट- यामाहा दुचाकींच्या आवाजाने नागरिक त्रस्त; तर ऊस वाहतूक ट्रॅक्टरमधील कर्णकर्कश टेपच्या आवाजात धोकादायक प्रवास होत आहे. मात्र, आरटीओ व पोलिसांनी कारवाई करण्याची नागरिकांची मागणी.
ग्रामीण भागात पुंगळ्या काढलेल्या दुचाकी, तसेच बुलेट व यामाहा कंपनीच्या गाड्यांवरील बदललेल्या सायलेंसरमुळे होणाऱ्या प्रचंड आवाजाने नागरिकांना मोठा त्रास सहन करावा लागत आहे. रात्री- अपरात्री आणि रहदारीच्या वेळेत या गाड्यांचे फटके व कर्णकर्कश आवाज वाढल्याने रुग्ण, वृद्ध, विद्यार्थी आणि लहान मुलांचे आरोग्य धोक्यात येत आहे. काही तरुणांकडून नियमबाह्य सायलेन्सर लावून सार्वजनिक रस्त्यांवर वेगात गाड्या चालवल्या जात असल्याने ध्वनिप्रदूषणासह अपघातांचीही भीती व्यक्त केली जात आहे. शाळा-महाविद्यालये, रुग्णालय परिसर व वस्ती भागातही अशा गाड्या धावल्याच्या तक्रारी वाढल्या आहेत. त्यामुळे कायदा-सुव्यवस्थेचा प्रश्नही निर्माण होत असल्याचे नागरिकांचे म्हणणे आहे.
मोटार वाहन कायद्यानुसार सायलेन्सरमध्ये छेडछाड करणे, ठरावीक ध्वनीमर्यादा ओलांडणे व रस्त्यावर स्टंटबाजी करणे हा गुन्हा असूनही संबंधितांवर प्रभावी कारवाई होत नसल्याची नाराजी व्यक्त होत आहे. त्यामुळे आरटीओ व पोलीस प्रशासनाने संयुक्त मोहीम राबवून नियमभंग करणाऱ्या गाड्यांवर दंडात्मक कारवाई करावी, गाड्या जप्त कराव्यात तसेच सायलेन्सर काढून टाकण्याची सक्ती करावी, अशी ठाम मागणी नागरिकांकडून होत आहे.
याबाबत प्रशासनाने तातडीने लक्ष घालून ध्वनिप्रदूषणाला आळा घालावा, अन्यथा आंदोलन छेडले जाईल, असा इशाराही नागरिकांनी दिला आहे.