मद्यधुंद वाहन चालकांवर ओतूर पोलिसांची कारवाई

ओतूर, ता. ३० ः ओतूर (ता. जुन्नर) येथील पोलिसांनी कल्याण- अहिल्यानगर महामार्गावर दारू पिऊन वाहन चालविताना नाकाबंदी दरम्यान आढळून आलेल्या वाहन चालकांवर कारवाई केली आहे.
या वाहनचालकांवर गुन्हे दाखल करून त्यांना न्यायालयात हजर केले असता न्यायालयाने त्यांना १० हजार रुपयांच्या दंडाची शिक्षा ठोठावली. धनराज कैलास ढगे (वय ३२, रा. ओतूर, ता. जुन्नर), प्रथमेश अरुण कुटे (वय २७, रा. पिंपरी पेंढार, ता. जुन्नर) हे दोघे दारू पिऊन वाहन चालवताना आढळल्याने त्यांच्यावर गुन्हा दाखल केला होता. त्या दाखल केलेल्या गुन्ह्याच्या दोषारोप पत्रांसह जुन्नर न्यायालय येथे मंगळवारी (ता. २९) दोघांना हजर केले असता, जुन्नर प्रथमवर्ग न्यायदंडाधिकारी नम्रता बिरादार यांनी आरोपींना प्रत्येकी १० हजार रुपये दंडाची शिक्षा ठोठावली आहे.
ही कारवाई ओतूरचे सहायक पोलिस निरीक्षक एल. जी. थाटे, पोलिस उपनिरीक्षक युवराज जाधव, संदीप आमणे, पोलिस हवालदार सुरेश गेंगजे, संदीप भोते, पोलिस अंमलदार श्याम जायभाये, किशोर बर्डे, कोर्ट कारकून अतुल भेके, सरकारी वकील अनुप लखोटीया यांनी केली आहे.