उदापूर येथील विद्यालयात वक्तृत्व स्पर्धा

ओतूर, ता. २ : उदापूर (ता‌. जुन्नर) येथील ग्राम विकास मंडळ ओतूर संचलित सरस्वती विद्यालयात लोकमान्य टिळक पुण्यतिथी व अण्णा भाऊ साठे जयंतीनिमित्त शालेय वक्तृत्व स्पर्धांचे आयोजन केले होते. महापुरुषांच्या महान कार्याची ओळख विद्यार्थ्यांना व्हावी, विद्यार्थ्यांमध्ये वाचनाची आवड व वक्तृत्व कला वृद्धिंगत व्हावी, यासाठी विद्यालयात वक्तृत्व स्पर्धांचे आयोजन केल्याची माहिती मुख्याध्यापक प्रतीक अकोलकर यांनी दिली.
या स्पर्धेत लोकमान्य टिळक एक युगपुरुष, लोकशाहीर अण्णा भाऊ साठे, माझी आई, मोबाईल शाप की वरदान, मी मुख्यमंत्री झालो तर, शाळा एक सुसंस्कार केंद्र आदी विषयांवर आधारित तीन गटात वक्तृत्व स्पर्धेचे आयोजन करण्यात आले होते. या स्पर्धेसाठी ७५ विद्यार्थी सहभागी झाले. शिक्षक प्रतिनिधी भरत भाईक यांनी आयोजन केले. दशरथ भाईक, सारिका मदन, योगेश गाढवे यांनी सूत्रसंचालन, तर सुरेखा ढमाले, प्रमोद जाधव, साईनाथ भोर यांनी आभार मानले.

लहान गटातील विजेते विद्यार्थी (पाचवी व सहावी)
अनुक्रमे प्रथम तीन क्रमांक - पायल कुलवडे, स्वरा वल्हवणकर, प्रसाद वायाळ.
मध्यम गट (सातवी व आठवी)
अनुक्रमे प्रथम तीन क्रमांक - पायल माळवे, श्रावणी बनकर, संस्कृती चौधरी व भक्ती अमूप.
मोठा गट (नववी व दहावी)
अनुक्रमे प्रथम तीन क्रमांक - अतिश महाकाळ, प्रथमेश म्हसणे, समीक्षा ठोसर हे आहेत.