सांगनोरे येथे बिबट्या जेरबंद

ओतूर, ता‌. १५ : सांगनोरे (ता. जुन्नर) येथून सोमवारी पहाटे बिबट्याला पिंजऱ्यात जेरबंद करण्यात ओतूर वनविभागाला यश आल्याची माहिती वनक्षेत्र अधिकारी चैतन्य कांबळे यांनी दिली.
सांगनोरे व पिंपळगाव जोगा धरणाच्या कडेला असलेल्या डोंगरावर आणि जंगल परिसरात बिबट्याचे पाळीव प्राण्यांवर हल्याचे प्रमाण वाढले होते. तसेच बिबट्याचे वारंवार होणारे दर्शनामुळे नागरिकांमध्ये दहशतीचे वातावरण निर्माण झाले होते. वनविभागाने बिबट्याचा बंदोबस्त करावा, अशी मागणी नागरिकांकडून होत असल्याने वनविभागाकडून सांगनोरे येथील मोरे वस्तीवर रविवारी बिबट्याचा बंदोबस्त करण्यासाठी पिंजरा लावण्यात आला होता. या पिंजऱ्यात सोमवारी (ता. १५) पहाटे बिबट्या जेरबंद झाला. हा बिबट्या जेरबंद झाला असल्याची माहिती मिळाल्यानंतर ओतूरचे वनक्षेत्र अधिकारी चैतन्य कांबळे यांच्या मार्गदर्शनाखाली वनविभागाचे वनपाल एस. एम. बुट्टे, वनरक्षक मोहिनी वाघचौरे, गणपत केदार, किसन केदार, फुलचंद खंडागळे, गंगाराम जाधव यांच्यासह इतर कर्मचाऱ्यांच्या पथकाने तेथे पोहोचून हा बिबट्याला ताब्यात घेतले आहे. हा बिबट्याला पिंजऱ्यासह सुखरूप माणिकडोह बिबट निवारण केंद्रात दाखल करण्यात आले. जेरबंद झालेला बिबट्या हा मादी जातीचा असून अंदाजे चार ते पाच वर्षे वयाचा असल्याची माहिती वनविभागाच्या सूत्रांकडून देण्यात आली.

1168