शिरोलीत उसावर खोडकिडीचा प्रादुर्भाव

ओझर, ता. ४ : शिरोली बुद्रुक (ता.जुन्नर) परिसरात उसावर खोडकीड,करपा, लोकरी मावा तसेच मररोग अशा विविध रोगांचा प्रादुर्भाव वाढला आहे. यामुळे खर्चात
वाढ झाली असून, उत्पादनात घट झाली आहे. खोडकिडीच्या प्रादुभावामुळे उसाचे पीक सोडून देण्याची वेळ शेतकऱ्यांवर आली आली आहे

हमखास उत्पादन देणारे पीक म्हणून शेतकरी उसाचे उत्पादन घेतात. काही वर्षापूर्वी उसाच्या पिकावर रोग किडींचा फारसा प्रादुर्भाव होत नसल्याने शेतकऱ्यांना कमी उत्पादन खर्चातही चांगले उत्पादन मिळत होते.

परंतु अलीकडच्या काळात ऊसाच्या पिकावर खोड किडीच्या प्रादुर्भावामुळे शिरोली बुद्रुक(ता.जुन्नर)येथील अलका निवृत्ती बोऱ्हाडे या महिला शेतकऱ्याचे एक एकर उसाचे पीक वाया गेले आहे.मागील वर्षीच्या गळीत हंगामात ऊसतोडणी झाल्यानंतर त्यांनी उसाचा खोडवा राखला होता.फुटवा झाल्यावर अंतर मशागत करून खते टाकून पाणी व्यवस्थापन योग्यरितीने केले. परंतु जमीन मुरूम आणि चुनखडी मिश्रित असल्याने ऊस पिकाच्या खोडात मोठया प्रमाणावर खोडकिडीचा प्रादुर्भाव झाला. खोडकिडीच्या नायनाटासाठी फवारणी करून पाण्यातून औषधे देखील सोडली. खोडकिड पाटपाण्याच्या पातळीच्या वरच्या थरातील मातीत असल्याने तिच्यावर औषधांचा परिणाम झाला नाही. खोडकिड नियंत्रणात न आल्याने उभ्या उसाच्या पिकाची मर होऊन ते सुकू लागले. साखर कारखाना गळीत हंगाम सुरू होण्यासाठी अजून अवकाश आहे. तोपर्यंत खोडकिड संपूर्ण पिकाचे नुकसान करील या भीतीने नाइलाजाने संबंधित महिला शेतकऱ्यावर ऊस जनावरांना चाऱ्यासाठी विकण्याची वेळ आली आहे.
01697, 01696