मलठणला अपघातात दुचाकीस्वाराचा मृत्यू

कवठे येमाई, ता. १ : मलठण (ता. शिरूर) येथे अष्टविनायक महामार्गावर दुचाकी घसरून झालेल्या अपघातात सुरेश दादाभाऊ बोऱ्हाडे (वय ३९, रा. सोनेसांगवी, ता. शिरूर) यांचा मृत्यू झाला. ही घटना शनिवारी (ता. ३१) सकाळी ११च्या सुमारास घडली. सुरेश बोऱ्हाडे हे त्यांच्या दुचाकीवरून (क्र. एम.एच. १२ ई.एस. ७९२) मलठण येथून सोनेसांगवीकडे जात असताना रस्त्यावरील वळणावर त्यांचा दुचाकीवरील ताबा सुटला आणि दुचाकी लोखंडी खांबाला जाऊन धडकली. या अपघातात ते गंभीर जखमी झाले होते. त्यांना तातडीने उपचारासाठी रुग्णालयात नेण्यात आले, मात्र वैद्यकीय अधिकाऱ्यांनी त्यांना उपचारापूर्वी मृत घोषित केले. याबाबत योगेश दादाभाऊ बोऱ्हाडे (वय ३६, रा. सोनेसांगवी) यांनी शिरुर पोलिस ठाण्यात फिर्याद दिली. पुढील तपास पोलिस हवालदार शरद वारे करीत आहे.