पाबळ परिसरात बिबट्याचा मुक्त संचार

पाबळ, ता. ७ : शिरूर तालुक्यातील पाबळ परिसरात गेल्या अनेक दिवसांपासून बिबट्याचा मुक्त संचार सुरू असून पशुधन आणि कुत्र्यांवरील हल्ल्यांच्या घटना वाढत आहेत. शनिवारी (ता. ६) रात्रीच्या सुमारास फुटाणवाडी येथील शेतकरी विशाल गोरक्ष गावडे यांच्या गोठ्यातील वासरावर बिबट्याने हल्ला करून ठार केले.
जनावरांचा आवाज ऐकताच गावडे यांनी आरडाओरडा केला, त्यानंतर बिबट्या पळून गेला. घटनेची माहिती शेतकरी गावडे यांनी तत्काळ वनपरिक्षेत्र अधिकारी निळकंठ गव्हाणे यांना दिली. त्यांच्या सूचनेनुसार वनरक्षक नारायण राठोड व वनकर्मचारी हनुमंत कारकुड यांनी घटनास्थळी भेट देत पंचनामा केला. पाबळ परिसरातील वाड्या-वस्त्यांवर बिबट्याच्या हल्ल्याच्या घटना वारंवार घडत असल्याने नागरिकांमध्ये भीतीचे वातावरण निर्माण झाले आहे. त्यामुळे वनविभागाने तातडीने पिंजरा लावून बिबट्याला जेरबंद करावे, अशी मागणी शेतकरी विशाल गावडे आणि माजी सरपंच सचिन वाबळे यांनी केली आहे.