सुपे सातकरवाडीच्या शिंगाडेंची कोल्हापूर-कन्याकुमारी मोहीम पूर्ण

पाईट, ता. २३ ः कोल्हापूर महापालिकेच्या अग्निशमन दलात कार्यरत असलेले भगवंत शिंगाडे यांनी १४ दिवस सायकलस्वारी करीत कोल्हापूर ते कन्याकुमारी हे १,४०० किलोमीटर अंतर पार केले. सुपे सातकरवाडी (ता.खेड) शिंगाडे हे मूळ गाव आहेत. त्यांच्या या कामाचे सर्वत्र कौतुक होत आहे.

निसर्गातील जल, जंगल, जमीन बचावासाठी शिंगाडे यांनी ही सायकलस्वारी केल्याचे त्यांनी सांगितले. वाढते शहरीकरण, विविध कारणांनी कमी होत चाललेले जमीनक्षेत्र आणि वनांवरील अतिक्रमण वाचवण्यासाठी शिंगाडे हे सतत प्रयत्न करीत आहेत. त्याचाच भाग म्हणून शिंगाडे यांनी तब्बल चौदा दिवस सायकल चालवून कोल्हापूर ते कन्याकुमारी, असे १,४०० किलोमीटर अंतर पार केले. या सायकलस्वारीदरम्यान दर १०० किलोमीटर अंतरवरील गावागावात त्यांनी जल, जंगल, जमीन बचावासाठी ग्रामस्थांना संदेश दिला. त्यांची सायकल देखील सर्व बाजूंनी संदेश फलकांनी भरलेली आहे.
सद्या उन्हाचा कडाका वाढलेला असूनही शिंगाडे यांनी जोखीम स्वीकारून ही मोहीम फत्ते केली. त्यामुळे त्याचे खेड तालुक्याच्या पश्चिम भागात कौतुक होत आहे.