धामणे पुलावरून वाहतूक सुरळीत

पाईट, ता. २९ : धामणे पुलावरून सोमवारी सकाळपासून वाहतूक सुरळीत सुरू करण्यात आली. यामुळे नोकरदारांनी सुटकेचा निःश्वास सोडला.
भामा आसखेड धरणातून शनिवारपासून (ता. २७ ) सायंकाळपासून भामा नदीपात्रात सुमारे १३३१२ क्यूसेकने पाणी सोडले होते. त्यामुळे धामणे गावाच्या पुलावरून पाणी गेले होते. तसेच धामणे-तळशेत मार्गे चाकण एमआयडीसीकडे होणारी वाहतूक पूर्णपणे बंद करण्यात आली होती. त्यामुळे नोकरदार वर्गाची मोठी गैरसोय झाली होती.
दरम्यान रविवारी (ता.२८) सायंकाळ सातपासून धरण क्षेत्रात पावसाचा जोर कमी झाल्याने भामा आसखेड धरणातून पाण्याचा विसर्ग बंद करण्यात आला. असे कालवा निरीक्षक वसंत धोकरे यांनी सांगितले. त्यामुळे सोमवारी सकाळपासून धामणे पुलावरून वाहतूक सुरळीतपणे सुरू झाली आहे.