फुलवडे येथे बीएसएनएलची सेवा खंडित

फुलवडे, ता. २ : फुलवडे (ता. आंबेगाव) येथे बीएसएनएल फोर-जी नेटवर्कचा टॉवर उभारला आहे. परंतु, अनेक समस्यांमुळे ही सेवा नियमितपणे सुरू नसल्याने ही सेवा वेळोवेळी खंडित होत आहे. ‘बीएसएनएल’व्यतिरिक्त कोणत्याही कंपनीचे नेटवर्क उपलब्ध नसल्याने या ठिकाणी ‘बीएसएनएल’ची सेवा अखंडितपणे सुरू राहावी, अशी अपेक्षा येथील नागरिकांनी व्यक्त केली आहे.
डोंगराळ भागात संपर्कासाठी मोबाईल नेटवर्कला खूप महत्त्व आहे. मात्र, गेल्या काही दिवसांपासून मोबाईलचे अचानक नेटवर्क जाणे, फोन सुरू असताना अचानक कट होणे, फोर-जी सेवा असली तरी टू-जीची सेवा मिळणे, अशा अनेक कारणांमुळे मोबाईलधारकांना नाहक त्रास सहन करावा लागत आहे.
अचानक कोणी आजारी पडले, कुणाचे निधन झाले, अशा वेळी निरोप देण्यासाठी मोबाईल नेटवर्क असणे अपेक्षित आहे. अनेकांचे नातेवाईक पुणे, मुंबई व इतर शहरांमध्ये असतात. त्यांच्याशी संपर्क साधला जाऊ शकत नाही. गावात ग्रामपंचायत कार्यालय, शाळा, टपाल कार्यालय, प्राथमिक आरोग्य उपकेंद्र, पतसंस्था, रेशनिंग दुकानासाठी मोबाईल नेटवर्क आवश्यक आहे. परंतु, नेटवर्क वेळोवेळी खंडित होत असल्याने अनेक कामांना अडथळा निर्माण होत असल्याने नागरिक त्रस्त झाले आहेत.
याबाबत ‘बीएसएनएल’चे अधिकारी चंद्रशेखर चव्हाण यांच्याशी संपर्क साधला असता ते म्हणाले की, डिंभे येथे लाइन कट झाल्याने नेटवर्क खंडित झाले आहे. लाइन जोडण्याचे काम सध्या सुरू असून, लवकरच नेटवर्क उपलब्ध होईल.