फुलवडेतील घाटरस्ता खचला

फुलवडे, ता. २८ : फुलवडे (ता. आंबेगाव) येथून भगतवाडीकडे जाणारा घाटरस्ता एका वळणावर खचला असून या मार्गाने वाहतूक करणे धोकादायक बनले आहे. त्यामुळे पुढील गावांचा संपर्क तुटू शकतो. याठिकाणी तत्काळ उपाययोजना कराव्यात अशी मागणी ग्रामस्थांनी केली आहे.
फुलवडे पासून भगतवाडी, गभालेवाडी, गणेशवाडी, दांडेवाडीकडे जाणाऱ्या रस्त्यावर ४ किलोमीटर अंतराचा घाटरस्ता आहे. हा घाटरस्ता वळणावळणाचा, अरुंद आणि तीव्र उताराचा आहे. कोणत्याही ठिकाणी संरक्षक कठडे तसेच दिशादर्शक फलक लावलेले नाहीत. पावसाळ्यात येथे दरड कोसळणे, रस्ता खचणे अशा घटना नेहमी घडतात. त्यामुळे घाट रस्त्यात सुरक्षिततेसाठी संरक्षक कठडे, दिशादर्शक फलक लावणे आवश्यक आहे. तरी सदर उपाययोजना कराव्यात अशी मागणी स्थानिक ग्रामस्थांनी केली आहे.