फुलवडे आश्रमशाळेत वाचन उपक्रम

फुलवडे ता. ११ : फुलवडे (ता. आंबेगाव) येथील अनुदानित आश्रमशाळेत ‘शांतता पुणेकर वाचत आहेत’ या महोत्सवाच्या अनुषंगाने वाचन उपक्रम गुरुवारी (ता. ११) उत्साहात पार पडला. विद्यार्थ्यांमध्ये वाचनाची आवड निर्माण व्हावी आणि वाचन संस्कृती अधिक रुजावी यासाठी हा उपक्रम महत्त्वपूर्ण ठरला.
पुणे शहरात १३ ते २९ डिसेंबर दरम्यान भव्य पुणे पुस्तक महोत्सव आयोजित करण्यात आला आहे. याच अनुषंगाने जिल्हाभर वाचन उपक्रम राबविण्यात येत आहेत. त्याचाच भाग म्हणून विद्यार्थ्यांनी पुस्तकांचे अवांतर वाचन करून उपक्रमात सहभाग घेतला. वाचन ही विद्यार्थ्यांच्या विकासातील महत्त्वाची प्रक्रिया आहे. वाचनामुळे शब्दसंपदा वाढते, विचारांमध्ये परिपक्वता येते. विद्यार्थ्यांमध्ये वाचन संस्कृती दृढ करण्यासाठी उपक्रम उपयुक्त ठरणार असल्याचे शिक्षकांनी सांगितले.
आश्रमशाळेतील शिक्षक सचिन बटवाल, खंडू कारंडे, विपुल घोलप, सचिन कारभळ आदींनी उपक्रम यशस्वितेसाठी प्रयत्न केले. पुढील काळातही अशा वाचन उपक्रमांचे नियमित आयोजन आश्रमशाळेत करण्यात येणार असल्याचे मुख्याध्यापक सोपान फटांगरे यांनी सांगितले.