आहुपे आश्रमशाळेतील विद्यार्थ्यांची राज्य हॉलीबॉल स्पर्धेसाठी निवड

फुलवडे, ता. २६ ः आहुपे (ता. आंबेगाव) येथील शासकीय माध्यमिक आश्रमशाळेतील विद्यार्थ्यांनी विभागीय क्रीडा स्पर्धेत चमकदार कामगिरी केली. या विद्यार्थ्यांची ५ ते ७ जानेवारी दरम्यान अमरावती येथे होणाऱ्या राज्यस्तरीय क्रीडा स्पर्धेसाठी निवड झाल्याची माहिती मुख्याध्यापक सुरेश हुले यांनी दिली. आदिवासी विकास विभाग, ठाणे अंतर्गत विभागीय क्रीडा स्पर्धा १८ ते २० डिसेंबर यादरम्यान शेंडेगाव (ता. शहापूर, जि. ठाणे) येथे पार पडल्या. यातील हॉलीबॉल स्पर्धेत १४ वर्षाखालील लहान गटात आहुपे आश्रमशाळेचा संघ ठाणे विभागामध्ये विजेता ठरला. यामध्ये अनुज वडेकर, साहिल केंगले, सुरज असवले, सुरज गवारी, करन असवले, सार्थक लांघी यांचा समावेश होता. या यशाबद्दल एकात्मिक आदिवासी विकास प्रकल्प कार्यालयाचे प्रकल्प अधिकारी प्रदीप देसाई, शिक्षण विस्तार अधिकारी सुरेश दुरगुडे, शाळा व्यवस्थापन समितीचे पदाधिकारी, पालक, ग्रामस्थ व शिक्षकांनी त्यांचे अभिनंदन केले आहे.