गायरान वस्ती शाळेस जिल्हा बँकेकडून मदत

पारगाव मेमाणे, ता. ३० : येथील गायरान वस्तीतील जिल्हा परिषद प्राथमिक शाळेला ५० हजार रुपयांचा विकासनिधी उपमुख्यमंत्री अजित पवार यांच्या वाढदिवसाचे औचित्य साधून पुणे जिल्हा मध्यवर्ती सहकारी बँकेच्या सीएसआर फंडातून बँकेचे अध्यक्ष प्रा. डॉ. दिगंबर दुर्गाडे यांनी दिला.
‘‘मुलांच्या शिक्षणात व गुणवत्तेत तडजोड करू नका. भौतिक व गुणात्मक सुधारणांसाठी सर्व प्रकारची मदत दिली जाईल. अनेक अडचणींवर मात करीत शिक्षण घ्यायचे असते. यश आपोआप आपल्याकडे चालत येते,’’ असे मार्गदर्शन दुर्गाडे यांनी केले.
शाळेच्या मुख्याध्यापिका स्नेहल गद्रे, खेंगरे यांनी धनादेश स्वीकारला.
शाळेसाठी लॅपटॉपची आवश्यकता होती. मात्र पालकांच्या माध्यमातून त्याची पूर्तता झाल्याने हा निधी शाळेतील चित्रमयता व सुशोभीकरणासाठी उपयुक्त होईल. यावेळी ग्रामपंचायत सदस्य जालिंदर मेमाणे, दादा मेमाणे, अनिल मेमाणे, दीपक मेमाणे, संजय पवार, दादा ढोले आदी उपस्थित होते.