श्री श्री रविशंकर विद्या मंदिरचा विजयी प्रारंभ

पुणे, ता. १८ ः पूनावाला फिनकॉर्प प्रस्तुत सकाळ स्कूलिंपिक्स क्रिकेट स्पर्धेला सुरुवात झाली. मुलांच्या पहिल्याच सामन्यात
विष्णू मुल्याच्या तडाखेबंद नाबाद ८४ धावांच्या जोरावर भूगाव येथील श्री श्री रविशंकर विद्या मंदिरने हडपसर येथील ग्रीनवुडज् स्कूलचा ३६ धावांनी पराभव केला.
सासवड-बोपदेव रस्त्यावरील ट्रिनिटी महाविद्यालयाच्या मैदानावर ही स्पर्धा सुरू झाली. नाणेफेक जिंकत ग्रीनवुडजने श्री श्री रविशंकर शाळेला फलंदाजी करण्याचे आमंत्रण दिले. सामन्याच्या पहिल्याच चेंडूला चौकार मारत शुभम पानसेने सुरेख सुरुवात केली. शुभम आणि विष्णूने प्रत्येक षटकांत किमान एक चौकार मारत नाबाद सलामी भागीदारी केली. तसेच ग्रीनवुडस् समोर दहा षटकांत १३२ धावांचे लक्ष्य ठेवले. विष्णूने ३४ चेंडूत १५ चौकार आणि एका षटकाराच्या मदतीने ८४ धावा फटकावल्या. आव्हानाचा पाठलाग करताना ग्रीनवुडजची सलामी जोडी लवकर परतली. भाविक चौधरीच्या २१ चेंडूत ३७ धावांच्या खेळी वगळता ग्रीन वुडजचा दुसरा कोणताही फलंदाज क्रिजवर पाय रोवू शकला नाही. शुभम आणि विष्णूने गोलंदाजीतही लक्षवेधक कामगिरी केली. त्यांच्या फिरकी गोलंदाजीच्या जोरावर श्री श्री रविशंकर शाळेने ग्रीनवुडजला ९५ धावांवर रोखले आणि सामना सहजरीत्या जिंकला. शुभम याने दोन षटकांत फक्त ११ धावा देत ३ गडी बाद केले. अष्टपैलू कामगिरीबद्दल विष्णू मुल्या हा सामन्याचा मानकरी ठरला.

संक्षिप्त धावफलक ः
श्री श्री रविशंकर विद्या मंदिर ः १० षटकांत बिनबाद १३१ - (विष्णू मुल्या नाबाद ८४, शुभम पानसे २८) वि.वि. ग्रीनवुडज् ः १० षटकांत ६ बाद ९५ (भाविक चौधरी ३७, अनिरुद्ध पांढरे २३, शुभम पानसे ३-११, विष्णू मुल्या १-११)