ऊसतोड कामगारांच्या बालकांचे सर्वेक्षण

पुणे, ता. ४ ः ऊसतोड हंगामात मजुरांसोबत स्थलांतर करणाऱ्या बालकांच्या शिक्षणात खंड पडू नये म्हणून, जिल्हा परिषदेच्या शिक्षण विभागाने सर्वेक्षण सुरू केले आहे. सर्वेक्षण करून बालकांना जवळच्या जिल्हा परिषद शाळेत शिक्षण दिले जाणार आहे. हे सर्वेक्षण ८ डिसेंबरपर्यंत पूर्ण करण्याची जबाबदारी शिक्षकांबरोबर अंगणवाडी सेविकांना देण्यात आली आहे.
राज्यात १ नोव्हेंबरपासून उसाचा गाळप हंगाम सुरू झाला आहे. गाळप हंगाम सुरू होऊन महिना झाला आहे. प्रशासनाने सर्वेक्षणाच्या आदेशानंतर सर्वेक्षण सुरू असले तरी प्रत्यक्षात विद्यार्थ्यांना शाळेत घेऊन येण्यासाठी काही दिवसांचा कालावधी जाणार आहे. प्राथमिक शिक्षण संचालक शरद गोसावी यांनी १९ नोव्हेंबर रोजी हंगामी स्थलांतरित होणाऱ्या कामगारांच्या बालकांचे शिक्षण अबाधित राखण्यासाठी सर्वेक्षण करण्याचे आदेश दिले आहेत. त्‍यानुसार जिल्‍हा परिषदेच्‍या शिक्षण विभागाने हे सर्वेक्षणाची कार्यवाही सुरू केली आहे. शिक्षण विभागाने राज्‍यातील १४ जिल्ह्यांमध्ये याबाबतचे सर्वेक्षण करत आहे. सर्व गावे, वाड्यावस्त्यांवर मुख्याध्यापकांच्या नियंत्रणाखाली शिक्षक, अंगणवाडी सेविका व मदतनीस हे प्रगणक म्हणून सर्वेक्षण करत आहेत.
राज्यात जवळपास १० लाख ऊसतोडणी कामगार आहेत. महिनाभरापासून ऊस तोडणीसाठी हे कामगार स्थलांतरित झाले आहेत. विविध जिल्ह्यांतून स्‍थलांतर झालेली बालके शोधून त्‍यांना शिक्षणाच्‍या मूळ प्रवाहात आणणे आवश्यक आहे. याबाबत प्राथमिक शिक्षण विभागाने कार्यपद्धती तयार केली आहे. त्‍यानुसार कार्यवाही करून माहिती संकलित केली जाणार असून, याबाबतचा अहवाल केला जाणार असल्याचे जिल्‍हा परिषदेच्या शिक्षण विभागाकडून सांगण्यात आले आहे.