कर्वेनगरच्या ‘मिलेनियम नॅशनल’चा दुहेरी जलवा

पुणे, ता. ११ : पूनावाला फिनकॉर्प प्रस्तुत सकाळ स्कूलिंपिक्स व्हॉलीबॉल स्पर्धेत १४ वर्षांखालील मुलींच्या गटात कर्वेनगर येथील मिलेनियम नॅशनल स्कूलच्या संघांचा जलवा पाहायला मिळाला. निर्विवाद वर्चस्व राखत ‘मिलेनियम नॅशनल’च्या ‘ड’ संघाने विजेतेपद, तर ‘क’ संघाने उपविजेतेपद असा दुहेरी बहुमान पटकाविला. तर १६ वर्षांखालील गटात प्रभात रस्ता येथील सिंबायोसिस स्कूलने अजिंक्यपद मिळविले.
डेक्कन जिमखाना येथे ही स्पर्धा पार पडली. प्रमुख अतिथी पुणे जिल्हा टेबल टेनिस संघटनेचे सचिव मधुकर लोणारे, सिंबायोसिस स्कूलचे प्रशिक्षक रमेश बामणे, मिलेनियम नॅशनल स्कूलचे प्रशिक्षक सिद्धार्थ जाधव यांच्या हस्ते विजेते, उपविजेते व तृतीय स्थानावरील संघांना पदके देऊन गौरविण्यात आले.
१४ वर्षांखालील मुलींच्या संघर्षपूर्ण अंतिम सामन्यात मिलेनियम नॅशनल स्कूलच्या ‘ड’ संघाने आपल्याच स्कूलच्या ‘क’ संघाचा २५-१९, २५-२२ असा सरळ दोन गेम्समध्ये पराभव केला. अनाया डिसा, गार्गी दलाल व शर्वरी सुर्वे यांनी चमकदार कामगिरी करून संघाच्या विजयात महत्वपूर्ण वाटा उचलला. मिलेनियम नॅशनलच्या ‘क’ संघाकडून अनुष्का कोंडे, ऐश्वर्या कानडे व राही ठक्कर यांनी अष्टपैलू प्रदर्शन केले. तिसऱ्या स्थानासाठी खेळल्या गेलेल्या सामन्यात सिंबायोसिस स्कूलने मिलेनियम नॅशनल स्कूलच्या ‘अ’ संघावर २५-४, २५-१२ असा सहज विजय मिळवून ब्राँझपदक जिंकले. सिंबायोसिसकडून राधा कशेडीकर, शमिका कांबळे, परिणिती जाधव यांनी, तर मिलेनियम नॅशनलकडून मान्यता जवळकर, शायना करविनकोप व आराध्या जाधवराव यांनी उत्तम खेळ केला.
१६ वर्षांखालील गटात विजेतेपदाच्या निर्णायक लढतीत सिंबायोसिस स्कूलने चंदननगरच्या केंद्रीय विद्यालयाचे आव्हान २५-५, २५-१५ असे सरळ दोन गेम्समध्ये सहज मोडीत काढले. विजेत्या संघाडून सिद्धी सणस, स्वराली कुलकर्णी व मनवा टन्नू यांनी, तर उपविजेत्या केंद्रीय विद्यालयाकडून आर्या झेंडे, श्रेया मस्के व दिव्या मेमाणे यांनी चमकदार कामगिरी बजावली. तिसऱ्या स्थानासाठी झालेल्या सामन्यात दिघी येथील रामचंद्र गायकवाड स्कूलने भिलारेवाडीच्या आर्यन्स वर्ल्ड स्कूलचा २५-७, २५-६ असा पराभव करून ब्राँझपदक मिळविले. रोशनी जयस्वाल, प्राजक्ता वाजे, धनश्री गुजरची अष्टपैलू कामगिरी संघाच्या विजयाचे मुख्य वैशिष्ट्य ठरले. ‘आर्यन्स वर्ल्ड’कडून पूर्वा मालुसरे, रितिका ठोकळे, काव्या पांचग्रीकर यांनी उत्तम प्रदर्शन केले.

अन्य निकाल : १४ वर्षांखालील मुली : (उपांत्य फेरी) : मिलेनियम नॅशनल ‘ड’, कर्वेनगर वि. वि. सिंबायोसिस, प्रभात रस्ता २५-२०, २६-२४. मिलेनियम नॅशनल ‘क’, कर्वेनगर वि. वि. मिलेनियम नॅशनल ‘अ’, कर्वेनगर १५-४, २५-८. (उपांत्यपूर्व फेरी) : मिलेनियम नॅशनल ‘क’, कर्वेनगर वि. वि. नालंदा इंग्लिश मीडियम, धायरी २५-३, २५-९. मिलेनियम नॅशनल ‘अ’ वि. वि. मिलेनियम नॅशनल ‘ई’ २५-२०, २६-२४. सिंबायोसिस, प्रभात रस्ता, वि. वि. पीजीकेएम, कोंढवा २५-५, २५-८. मिलेनियम नॅशनल ‘ड’ वि. वि. सेंट हेलेनाज २५-१०, २५-९.
१६ वर्षांखालील मुली ः उपांत्य सामना - सिंबायोसिस स्कूल वि.वि. रामचंद्र गायकवाड स्कूलवर २५-१९, २५-१८.
केंद्रीय विद्यालय, चंदननगर वि.वि. आर्यन्स वर्ल्ड स्कूल २५-९, २५-६.