सकाळ प्रीमियर क्रिकेट लीग आजपासून सुरू

सर्व लोगो वापरणे

पिंपरी, ता. १५ ः सकाळ माध्यम समूहाच्यावतीने पिंपरी येथे क्रिसाला ग्रुप आणि अनुप मोरे स्पोर्ट्‌स ॲण्ड सोशल फाउंडेशन प्रस्तुत पहिल्या सकाळ प्रीमियर क्रिकेट लीग स्पर्धेला मंगळवारपासून (ता.१६) सुरुवात होत आहे. या स्पर्धेसाठी नवमहाराष्ट्र महाविद्यालयाचे मैदान सज्ज झाले असून पहिल्या दिवशी चार सामने रंगणार आहेत.
पिंपरी चिंचवड टेनिस क्रिकेट असोसिएशन यांच्या मान्यतेने दिवस-रात्र पद्धतीने टेनिस चेंडूवर ही स्पर्धा भरविली जात आहे. स्पर्धेचे बुधवारी (ता.१७) उद्‍घाटन भारतीय क्रिकेट संघाचे माजी कर्णधार दिलीप वेंगसरकर यांच्या हस्ते होणार आहे. स्पर्धेमध्ये एकूण ३२ संघांनी सहभाग घेतला आहे. पहिल्या दिवशी एकूण चार सामने होणार आहेत. दुपारच्या सत्रात दोन वाजता क्रेझी इलेव्हन आणि सुमीत भाऊ इलेव्हन यांच्यात, तर तीन वाजता जय मल्हार आणि पुणे पोलिस संघांमध्ये सामने रंगणार आहेत.
रात्रीच्या सत्रात संध्याकाळी सात वाजता सह्याद्री पिंपरी चॅलेंजर विरुद्ध रायझिंग स्टार, रावेत तसेच रात्री आठ वाजता धीरेन भाई शहा विरुद्ध मृत्युंजय हे संघ मैदानात उतरणार आहेत.
सामन्यातील प्रत्येक तिसरे षटक हे ‘टेप बॉल’चे राहणार आहे. त्यामुळे उसळत्या वेगवान चेंडूंना सामोरे जाताना फलंदाजांची कसोटी लागणार आहे, तर गोलंदाजांना त्याला बाद करण्याची चांगली संधी मिळण्याची अपेक्षा आहे. खेळ अधिक जलद आणि रंगतदार होणार आहे. निधी केटरर्स आणि ‘ऑक्सिकूल पॅकेजड् ड्रिंकिंग वॉटर’ यांचे स्पर्धेसाठी विशेष सहकार्य लाभले आहे.

स्पर्धेतील पारितोषिके
- विजेत्या संघाला करंडक आणि दीड लाख रुपये
- उपविजेत्या संघाला चषक आणि एक लाख रुपये
- तृतीय क्रमांकाच्या संघाला चषक व ७५ हजार रुपये
- चतुर्थ क्रमांकासाठी चषक व ५० हजार रुपये

सकाळ प्रीमियर क्रिकेट लीगच्या माध्यमातून ‘आयपीएल’च्या धर्तीवर चांगले व्यासपीठ तयार करण्यात आले आहे. त्याद्वारे नवोदित खेळाडूंना स्वतःची गुणवत्ता दाखविण्याची चांगली संधी मिळू शकेल. तसेच अनुभवी खेळाडूंचाही खेळ क्रिकेटप्रेमींना पाहणे शक्य होईल.
- नीलेश शेळके, व्यवस्थापकीय संचालक, ऑक्सिकूल पॅकेजड् ड्रिंकिंग वॉटर

सकाळ प्रीमिअर क्रिकेट लीग ही स्पर्धा ‘सकाळ’ प्रथमच भरवत आहे, याचा आम्हा पिंपरी चिंचवडमधील क्रिकेटप्रेमींना आनंद आहे. या स्पर्धेमुळे शहरासह पुणे जिल्ह्यातील खेळाडूंना चांगली संधी मिळेल. अशा स्पर्धांमधूनच शहरातील खेळाडू राज्य, राष्ट्रीय, आंतरराष्ट्रीय स्तरावर चमकू शकतील. त्यामुळे अशा स्पर्धा होणे ही काळाची गरज आहे. स्पर्धेसाठी सर्वांना शुभेच्छा.
- संदीप वाघेरे, माजी नगरसेवक, पिंपरी चिंचवड