उमेदवारावर गुन्हे दाखल करण्याची माणगी

पुणे, ता. २६ : साकुर्डे (ता. पुरंदर) ग्रामपंचायतीच्या २०२१च्या निवडणुकीत विशेष मागावर्गीय (ओबीसी) आरक्षणाचे उल्लंघन झाले आहे. त्यामुळे जात पडताळणी समितीनेही त्याबाबत आदेश दिला आहे. त्यानुसार संबंधित उमेदवारावर जिल्हा प्रशासनाने गुन्हा दाखल करावा, अशी मागणी माहिती अधिकार कार्यकर्ते मृणाल ढोले पाटील आणि सतीश भोंगळे यांनी पत्रकार परिषदेत शुक्रवारी केली.
साकुर्डे ग्रामपंचायतीसाठी २०२१-२६ या कालावधीसाठी झालेल्या निवडणुकीत वॉर्ड क्रमांक एक ओबीसीसाठी राखीव होता. मात्र, सचिन थोपटे यांनी बनावट ओबीसी प्रमाणपत्र सादर करून निवडणूक जिंकली. सहा महिन्यात जात पडताळणी प्रमाणपत्र सादर न केल्यास रद्द होते. तरीही निवडणूक अधिकाऱ्यांनी त्याकडे दुर्लक्ष केले. तत्कालीन जिल्हाधिकारी सुहास दिवसे आणि विभागीय आयुक्त चंद्रकांत पुलकुंडवारांकडे अनेक वेळा निवेदने करूनही, त्यांनी प्रकरणाकडे दुर्लक्ष केले. याप्रकरणी १८ डिसेंबरला जिल्हाधिकारी जितेंद्र डुडी यांनी निकाल दिला असून, थोपटे यांचे पद अपात्र ठरविण्यात आले. त्या मुळे जिल्हा प्रशासनाची फसवणूक केल्याबद्दल थोपटे यांच्यावर गुन्हा दाखल करून सहा वर्षे अपात्र करण्याची मागणी भोंगळे आणि ढोले पाटील यांनी केली.