युद्धाची धग जिल्ह्यातील बाजारात

पुणे, ता. ११ : हजारो मैल दूर अमेरिका, इराण आणि इस्राईलमध्ये पेटलेल्या युद्धाचा वणवा आता पुणे जिल्ह्याच्या बाजारपेठेपर्यंत धग पोहोचवू लागला आहे. या जागतिक संघर्षामुळे उद्‍भवलेल्या तीव्र गॅसटंचाईने जिल्ह्याची औद्योगिक आणि कृषी अर्थव्यवस्था संकटात सापडली असून, व्यावसायिक गॅसअभावी चाकण, पिंपरी-चिंचवड आणि हिंजवडी पट्ट्यातील शेकडो हॉटेल, ढाबे व कंपनी कॅंटीन्स बंद पडण्याच्या उंबरठ्यावर आहेत. जिल्ह्याच्या कानाकोपऱ्यातून येणाऱ्या भाजीपाल्याला हक्काची बाजारपेठ असलेल्या हॉटेल व्यावसायिकांनी पाठ फिरवल्याने मागणी कमालीची घटली आहे. परिणामी, शेतात राबणाऱ्या बळिराजाचा माल बाजार समित्यांमध्ये पडून राहण्याची भीती निर्माण झाली असून, व्यापारी आणि शेतकरीवर्गात चिंतेचे सावट आहे. युद्धाची आग सातासमुद्रापार लागली असली, तरी त्याचा थेट फटका मात्र पुणे जिल्ह्यातील कष्टकरी आणि उत्पादकवर्गाला सोसावा लागत आहे.