भोर मतदारसंघातील विकास कामांना निधी मंजूर

पिरंगुट, ता. २८ : भोर मतदारसंघातील विकास कामांना ३८ कोटी ७२ लक्ष रुपये मंजूर झाल्याची माहिती आमदार शंकर मांडेकर यांनी दिली. राज्याचे उपमुख्यमंत्री व पुणे जिल्ह्याचे पालकमंत्री अजित पवार यांच्या माध्यमातून जिल्हा वार्षिक योजनेमधून भोर, वेल्हे व मुळशी तालुक्यातील १४६ विकास कामांना हा निधी मंजूर झाला आहे. याबाबत अधिक माहिती देताना आमदार शंकर मांडेकर यांनी सांगितले की, २०२५-२६ मधील जिल्हा नियोजन समितीमधून अंतर्गत रस्ते, गटर, कोल्हापूर पध्दतीचे व लघु पाटबंधारे दुरुस्ती व नवीन बंधारा बांधणे, ग्रामपंचायत कार्यालय बांधकाम करणे, सोलार दिवे, नवीन अंगणवाडी इमारत बांधणे, स्मशानभूमी सुधारणा करणे, प्राथमिक आरोग्य केंद्र विस्तारीकरण व देखभाल दुरुस्ती करणे आदी कामांसाठी हा निधी उपलब्ध झाला आहे.
जिल्हा वार्षिक योजनेतून पुढील कामांना विभागानुसार निधी मंजूर झाला आहे. सुविधा ५४ कामांना ८ कोटी २९ लक्ष ६० हजार रुपये, नागरी सुविधा ३४ कामांना ५ कोटी ६७ लक्ष ३० हजार रुपये, ग्रामीण रस्ते ३०-५४ रस्ते ३२ कामांना ८ कोटी ३० लक्ष रुपये, इतर जिल्हा मार्ग ५०-५४ रस्ते ७ कामांना ४ कोटी ५० लक्ष रुपये, जलसंधारण विभागाच्या ११ कामांना २ कोटी २० लक्ष ५५ हजार रुपये, नवीन अंगणवाडी इमारत बांधणे ५ कामांना ५६ लक्ष २५ हजार रुपये, प्राथमिक आरोग्य केंद्र विस्तारीकरण व देखभाल दुरुस्ती करणे आदी ३ कामांना ८ कोटी ८९ लक्ष २९ हजार रुपये याप्रमाणे हा निधी मंजूर झाला असून निविदा प्रक्रिया पूर्ण झाल्यानंतर कामांना सुरुवात होणार आहे.