खारावड्याच्या म्हसोबाला सुवर्ण हार अर्पण करण्यात येणार

पिरंगुट, ता. ३ : खारावडे (ता. मुळशी) येथील श्री म्हसोबा देवाच्या मूर्तीला भाविकांच्या सहयोगातून १०१ तोळ्यांचा बेलपत्रांचा सुवर्ण हार अर्पण करण्याचा संकल्प केला आहे. येत्या २ एप्रिलच्या चैत्र पौर्णिमेला श्री म्हसोबा देवस्थानचा वार्षिक उत्सव असून त्यानिमित्त हा संकल्प केला असून त्याच दिवशी हा विशेष सुवर्ण हार देवाला अर्पण करण्याचा सोहळा आयोजित केल्याचे देवस्थानच्या अध्यक्षा मधुरा भेलके यांनी सांगितले.
खारावडे येथील निसर्गरम्य परिसरात वसलेले श्री म्हसोबा देवस्थान हे एक पुरातन व स्वयंभू मंदिर असून भाविकांच्या श्रद्धेचे महत्त्वपूर्ण केंद्र आहे. श्री म्हसोबा देव नवसाला पावणारा देव आहे, अशी दृढ मान्यता भाविकांमध्ये आहे. या देवस्थानला ‘ब’ वर्गातील तीर्थक्षेत्र म्हणून घोषित केलेले असून दिवसेंदिवस दर्शनासाठी येणाऱ्या भाविकांची संख्या मोठ्या प्रमाणावर वाढत आहे.
भेलके म्हणाल्या, ‘‘श्री म्हसोबा देवावरील श्रद्धा आणि भक्तीपोटी १०१ तोळ्यांचा सुवर्णहार देवाला अर्पण करण्याचा संकल्प भाविकांनी केला आहे. त्यामुळे विश्वस्तांच्या संकल्पनेतून हा सुवर्णहार अर्पण केला जाणार आहे. या सुवर्ण हाराच्या घडणावळीचे काम पुण्यातील नीळकंठ ज्वेलर्स यांच्याकडे सुरू करण्यात आले आहे.’’