चांगल्या उत्पादनासाठी मोहोराचे संरक्षण गरजेचे

पिरंगुट, ता. ४ : ‘‘आंबा पिकाच्या चांगल्या उत्पादनासाठी मोहोराचे संरक्षण करणे गरजेचे आहे. यावर्षी आंब्याच्या झाडांना सर्वत्र चांगला मोहोर आला आहे. फळ काढणीपर्यंत पाणी व्यवस्थापन व औषध फवारणी महत्त्वाची आहे. शेतकऱ्यांनी ढगाळ हवामान व पाऊस यापासून मोहोराचे संरक्षण करण्यासाठी औषधांची माहिती घ्यावी,’’ असे आवाहन कृषी तज्ज्ञ विजयकुमार धुमाळ यांनी केले.
मुळशी तालुका शेतकरी संघाच्यावतीने पिरंगुट (ता. मुळशी) येथील शेतकरी मेळाव्यात धुमाळ बोलत होते. यावेळी निर्यात तज्ज्ञ अभिजित बसाळे म्हणाले, ‘‘मुळशी तालुक्यातून आंबा निर्यात होऊ शकतो. जून महिन्यापासून ते फळ काढणीपर्यंत योग्य काळजी घेतल्यास निर्यातक्षम फळे मिळू शकतात. अमेरिका व लंडन येथे फळे निर्यात करताना अधिक काळजी घ्यावी लागते.’’
तालुका कृषी अधिकारी हनुमंत खाडे म्हणाले, ‘‘आंब्याच्या बागेची स्वछता महत्त्वाची असते. सेंद्रिय खते व औषधांचा वापर करावा. बॅगींग करावे, सापळे लावावेत त्यामुळे फळांचा दर्जा चांगला राहतो. तसेच ग्राहकांशी संपर्क साधून विक्री केल्यास जास्त फायदा मिळतो.’’
यावेळी तालुक्यातील काही शेतकऱ्यांनी निर्यातक्षम आंबा उत्पादन घेण्याची तयारी दर्शवली. यावेळी शिवार फेरी काढून प्रत्यक्षात झाडांची माहिती देण्यात आली. तसेच शैक्षणिक सहलीची माहिती देण्यात आली. ॲग्रोवन अंकाच्यावतीने महेश बेल्हे यांनी नवीन वर्षातील योजनांची माहिती दिली. धोंडिबा केदारी यांनी प्रास्ताविक केले.
यावेळी शांताराम इंगवले, महादेव कोंढरे, भानुदास पानसरे, दगडूकाका करंजावणे, राजेंद्र कुदळे, अंकुश वाशिवले, रमेश पवळे, रामदास गोळे, रामदास साठे, संघाचे अध्यक्ष राजेंद्र मारणे आदी उपस्थित होते.