परिंचे येथे बुधवारी महाराजस्व अभियान

परिंचे, ता. २० : परिंचे (ता. पुरंदर) येथील कर्मवीर भाऊराव पाटील विद्यालयात तहसीलदार पुरंदर तसेच सर्व शासकीय विभागांच्या वतीने बुधवारी (ता. २४) छत्रपती शिवाजी महाराज महाराजस्व अभियान समाधान शिबिर पार पडणार आहे. आमदार विजय शिवतारे यांच्या अध्यक्षतेखाली कार्यक्रमाचे आयोजन केल्याची माहिती तहसीलदार विक्रम राजपूत यांनी दिली.
या शिबिरामध्ये महसूल विभाग, पंचायत समिती, कृषी, वन, सार्वजनिक बांधकाम, आरोग्य, पोलिस, पशुधन, पाटबंधारे, महावितरण, सहकार, महिला व बालकल्याण, परिवहन, पुरवठा आदी विभागांचा समावेश आहे. शासनाच्या विविध योजनांतर्गत लाभ मिळालेल्या लाभार्थींना शिवतारे यांच्या हस्ते प्रमाणपत्र व धनादेश देण्यात येणार आहे.
सकाळी साडेदहा ते पाच या वेळेत प्रत्येक विभागानुसार दालन तयार करून विविध योजना, त्यासाठी लागणारे अर्ज, कागदपत्रांच्या अडीअडचणी समजून घेऊन निराकरण करण्यात येणार आहे. आरोग्य विभागाच्या वतीने सर्व रोग निदान शिबिराचे आयोजन केले असून परिंचे मंडल अंतर्गत येणाऱ्या गावातील नागरिकांनी या उपक्रमाचा लाभ घेण्याचे आवाहन राजपूत यांनी केले आहे.