मुळशीत महाराजस्व अभियानातंर्गत सेवा पंधरावडा

पौड, ता. १५ : छत्रपती शिवाजी महाराज महाराजस्व अभियानांतर्गत मुळशी तहसीलदार कार्यालयाकडून सेवा पंधरावड्याचे आयोजन करण्यात आले आहे. १७ सप्टेंबर ते २ ऑक्टोबर या कालावधीत हे अभियान तीन टप्प्यात राबविण्यात येणार असल्याची माहिती तहसीलदार विजयकुमार चोबे यांनी दिली.
पहिल्या टप्प्यात १७ सप्टेबर ते २१ सप्टेंबर दरम्यान १४ मंडळातील २८ गावामधील पाणंद रस्ते गाव नकाशावर सदर अ,ब,क,ड,ई असे मार्क करून गाव नमुना एक एफ मध्ये त्याची नोंद घेतली जाणार आहे. त्या रस्त्याचे ग्रामसभेत वाचन करून मान्यता घेऊन हे पाणंद रस्ते अतिक्रमणमुक्त करणार असून रस्त्याच्या दोन्ही बाजूला झाडे लावणार आहोत. दुसऱ्या टप्पा २३ सप्टेंबर ते २७ सप्टेंबर दरम्यान सर्वांसाठी घर ही संकल्पना राबविणार असून कातकरी समाजाला घरे देण्यासाठी अभियान राबविले जाणार आहे.
तिसऱ्या टप्पा २८ सप्टेंबर ते २ ऑक्टोबर दरम्यान १९९३ ची लक्ष्मी योजना राबविण्यात येणार आहे. सातबाऱ्यावर पुरूषांप्रमाणे महिलांनाही समसमान अधिकार देण्याचा प्रयत्न करण्यात येणार आहे. तसेच दिव्यांग बांधवांचा सर्व्हे झालेला असून दिव्यांगांना शासकीय योजनेचा लाभ मिळतो की नाही याची खातरजमा केली जाणार आहे. या सेवा पंधरावड्याचा जास्तीत जास्त नागरिकांनी लाभ घ्यावा असे आवाहन तहसीलदार चोबे यांनी केले आहे.