खामगाव परिसरात बिबट्याची दहशत

राहू, ता. ६ : खामगाव (ता. दौंड) परिसरात बिबट्याची दहशत कायम आहे. त्यामुळे नागरिकांमध्ये भीतीचे वातावरण पसरले आहे. या परिसरात वन विभागाने तातडीने पिंजरा लावण्याची मागणी सरपंच योगेश मदने, सामाजिक कार्यकर्ते अनिल नागवडे, विठ्ठलराव बर्वे, डॉ. संदीप खेडेकर, बापूसाहेब दळवी यांच्यासह ग्रामस्थांनी केली आहे.

खामगाव येथील अविनाश नागवडे यांची आणि साईनाथ नागवडे यांची शेळ्यांवर सोमवारी (ता. ५) मध्यरात्रीच्या सुमारास बिबट्याने हल्ला केला. त्यात दोन शेळ्या ठार झाल्या. परिसरात उसाच्या बांधावर बिबट्या वावरताना साईनाथ नागवडे या शेतकऱ्याने दिवसा पाहिला आहे. शेतामध्ये अनेक ठिकाणी त्याच्या पायाचे ठसे देखील शेतकऱ्यांना आढळून आले आहेत. येथील गणेश नगर परिसरात एक मादी आणि तीन बछडे वावरताना दिसल्याचे नागवडे यांनी सांगितले. त्यामुळे परिसरात मोठी दहशत निर्माण झाली आहे. मात्र, पिंजरा लावण्यास वन विभागाकडून सोईस्कर टाळाटाळ होत आहे, असे येथील नागरिकांचे म्हणणे आहे.
खामगाव फाटा ते खामगाव तसेच गाडोमोडी चौक ते तांबेवाडीदरम्यान रस्त्याच्या कडेला बिबट्या वावरताना दिसला. गाडीच्या उजेडामुळे त्याने उसाच्या शेताकडे धूम ठोकली. वनविभागाच्या अधिकाऱ्यांनी घटनास्थळी भेट देऊन बिबट्याचा बंदोबस्त करण्यासाठी तातडीने पिंजरे लावावेत, अशी मागणी होत आहे.
ग्रामस्थांनी अनेकदा मागणी करून देखील वन विभागाने ग्रामस्थांच्या निवेदनाला मात्र केराची टोपली दाखवत वरिष्ठ कार्यालयाकडे बोट दाखवत सोईस्कर टाळाटाळ केल्याचे सरपंच योगेश मदने व अनिल नागवडे यांनी सांगितले.
वन विभागाने पकडलेले बिबटे नेमके कोठे सोडतात, याचा पुरावा त्या गावातील सरपंच व पोलिस पाटील यांना लोकेशन नुसार गोपनीय देण्यात द्यावा, अशी मागणी अनिल नागवडे यांनी केली.

‘माणसं मेल्यावर पिंजरे लावणार का’
खामगाव परिसरात बिबट्याच्या दहशतीमुळे ग्रामस्थ भयभीत झाले आहे. वन विभागाला वारंवार पत्र व्यवहार करून देखील वन विभाग याकडे सोयिस्कर दुर्लक्ष करत आहे. प्रत्यक्षात माणसं मेल्यानंतर तुम्ही बिबट्याला जेरबंद करणार का? अशा संतप्त भावना सरपंच योगेश मदने यांच्यासह सामाजिक कार्यकर्ते अनिल नागवडे यांनी व्यक्त केल्या.