दांडियासाठी रात्री १० वाजेपर्यंत परवानगी

राजगुरुनगर, ता. १८ : नवरात्रीमध्ये दांडियास रात्री १० वाजेपर्यंतच परवानगी असून लेझर लाइटचा वापर केल्यास तात्काळ कारवाई करण्यात येईल, असा इशारा खेड पोलिसांनी नवरात्र उत्सव मंडळांना दिला. मूर्तीच्या रक्षणाची आणि महिलांची छेडछाड होणार नाही याची जबाबदारी मंडळांची आहे, असेही त्यांनी सांगितले. तसेच खोडसाळपणे दांडियाच्या कार्यक्रमांमध्ये घुसणाऱ्यांना पोलिसांच्या ताब्यात देण्याच्या सूचना त्यांनी दिल्या.‌
खेड पोलिस ठाण्याच्या वतीने येथे गुरूवारी (ता. १८) सार्वजनिक नवरात्र उत्सवाच्या अनुषंगाने हद्दीतील नवरात्र उत्सव मंडळांचे अध्यक्ष, पदाधिकारी आणि पोलिस पाटलांची बैठक पोलिस निरीक्षक सुभाष चव्हाण यांच्या उपस्थितीत झाली. या बैठकीमध्ये नवरात्र उत्सव सुरक्षितपणे पार पाडण्यासाठी पोलिस अधिकाऱ्यांनी मंडळांना सूचना दिल्या.
नोंदणीकृत नसलेल्या मंडळांनी धर्मदाय आयुक्तांकडून तात्पुरता परवाना घ्यावा. पोलिस, नगरपालिका, ग्रामपंचायत, महावितरण यांच्या परवानग्या प्राप्त कराव्यात. दिवसरात्र देवीच्या मूर्तीच्या दागिन्यांच्या संरक्षणासाठी व्यवस्था करावी. मंडपामध्ये रोषणाई व वीज जोडणी सुरक्षित असल्याचे प्रमाणपत्र वीज मंडळाकडून घ्यावे, देवीच्या मंडपात आग प्रतिबंधक उपाययोजना कराव्यात, अशा सूचना या बैठकीत देण्यात आल्या.‌
सर्वोच्च न्यायालयाच्या आदेशानुसार ध्वनिक्षेपकाबाबत दिलेल्या मार्गदर्शक तत्त्वांचे पालन करावे. ध्वनिक्षेपकावर अश्‍लील गाणी लावू नयेत. जात, धर्म, पंथ, व्यक्ती, समाज यांच्या भावना दुखिवतील, असे फ्लेक्स, देखावे व नृत्य संगीत होणार नाहीत याची दक्षता खबरदारी घ्यावी. लेझर लाइटचा वापर करू नये, अन्यथा कारवाई करण्यात येईल, असे या बैठकीत सांगण्यात आले.