खरपुडीतील मंदिरातील दागिने लांबविले

राजगुरूनगर, ता. ६ : खरपुडी खुर्द (ता. खेड) येथील प्रतिजेजुरी म्हणून प्रसिद्ध असलेल्या खंडोबा मंदिरात मंगळवारी रात्री चोरट्यांनी डाका घालून खंडोबा देवाचे २० किलो चांदीचे दागिने लांबविले. अंदाजे ४० लाख रुपयांचा हा ऐवज आहे. तसेच होलेवाडी येथील मळूआई मंदिरातही रात्री चोरी झाली असून देवीचे दागिने चोरीला गेले आहेत.‌
चोरट्यांनी गुरुवारी रात्री मुख्य मंदिराच्या दरवाजाचे कुलूप तोडून गाभाऱ्यात प्रवेश केला. खंडोबा, म्हाळसा व बानूच्या मूर्तीवरील चांदीचे हार, उत्सव मूर्ती, स्वयंभू पिंडीवरील चांदीचे कवच, देवाची पगडी, चांदीचे सहा हार, बानू व म्हाळसा देवीचे मुकुट, सिंहासन, वाघ मूर्ती असा सर्व चांदीचा ऐवज चोरून नेला. सुमारे २० किलोचा हा ऐवज आहे.
दानपेटी फोडून पेटीतील ६० ते ७० हजार रुपयेही चोरले. पहाटे पाच वाजता राजेश गाडे हे पुजारी देवपूजा करण्यासाठी आले असता चोरी झाल्याचे निदर्शनास आले. त्यानंतर त्यांनी विश्वस्तांना कळविले. त्यांनी पोलिसांना पाचारण केले. पोलिसांनी श्वानपथक आणून चोरट्यांचा माग काढण्याचा प्रयत्न केला.‌ मंदिर परिसरातील सीसीटीव्ही यंत्रणा बंद असल्यामुळे चोरट्यांची संख्या समजू शकली नाही.