पतसंस्थांनी समाजाच्या आर्थिक गरजा भागवाव्यात

सोमेश्वरनगर, ता. ३१ : ‘‘पतसंस्था समाजाच्या वेगवेगळ्या आर्थिक गरजा भागवत असतात. त्यामुळे त्या जोपासल्या पाहिजेत आणि त्यांची वाढ निकोप पद्धतीने झाली पाहिजे. मात्र, पतसंस्थांनी आपल्या प्रभावक्षेत्रातच काम करावे’’, असे आवाहन राज्याचे सहकार आयुक्त दीपक तावरे यांनी दिला.
सासवड (ता. पुरंदर) येथे समता नागरी सहकारी पतसंस्थेच्या नूतन शाखेचे उद्घाटन तावरे यांच्या हस्ते पार पडले. अध्यक्षस्थानी माजी सहकार आयुक्त अनिल कवडे होते. याप्रसंगी जिल्हा बँकेचे अध्यक्ष डॉ. दिगंबर दुर्गाडे, अप्पर आयुक्त श्रीकृष्ण वाडेकर, माजी अप्पर आयुक्त शैलेश कोथमिरे, जिल्हा उपनिबंधक प्रकाश जगताप, मिलिंद सोबले, यशवती मेश्राम, विजय कोलते, पुरुषोत्तम जगताप, सतीश काकडे, प्रमोद काकडे, आर. एन. शिंदे, दत्ता चव्हाण, राजेश काकडे, विराज काकडे, दत्ता झुरुंगे, शैलेश रासकर, लक्ष्मण गोफणे उपस्थित होते.
तावरे म्हणाले, कोल्हापूरच्या पतसंस्था पुण्यात, कोकणात गेल्या आणि त्यांना आवाका झेपला नाही. त्यामुळे पतसंस्थांनी आपापल्या प्रभावक्षेत्राची ओळख सोडून लांब जाऊन शाखा काढू नयेत. तामिळनाडू, केरळ राज्यांमध्ये सोसायट्या सोनेतारण कर्ज मोठ्या प्रमाणावर देतात.

अनिल कवडे यांनी, बँकांप्रमाणे पतसंस्थांच्या ठेवीला संरक्षण मिळावे यासाठी प्रयत्न करावा. त्यामुळे विश्वासार्हता वाढेल. तसेच आधुनिक तंत्रज्ञानाचा अवलंब करून सुलभ सेवा द्यावी.

श्रीकृष्ण वाडेकर यांनी समता पतसंस्थेच्या कामकाजाची प्रशंसा करत दोन वर्षात एकही तक्रार आली नसल्याचे नमूद केले. शैलेश कोथमिरे यांनी, जास्त शाखा न काढता व्यवसायवाढीकडे लक्ष दिल्याने समता पतसंस्थेची वाटचाल योग्य दिशेने असल्याचे सांगितले.

समताचे अध्यक्ष दिलीप फरांदे यांनी प्रास्ताविक केले. व्यवस्थापक राहुल ढोले यांनी स्वागत केले. महाव्यवस्थापक युवराज फरांदे यांनी आभार मानले.

04765