वाणेवाडीतील मळशी वस्तीवर घरफोडीचा प्रयत्न

सोमेश्वरनगर, ता. १९ : वाणेवाडी (ता. बारामती) जवळील मळशी या वस्तीवर येथे मध्यरात्री चोरट्यांनी घरफोडीचा प्रयत्न केला; मात्र जगताप कुटुंबीयांच्या सतर्कतेने तो टळला. मळशी येथील माजी पंचायत समिती सदस्या नीलिमा अविनाश जगताप यांची वस्ती चोरट्यांनी लक्ष्य केली. चोरट्यांनी घराबाहेरील बल्ब बंद करून अंधारात घराभोवतीचे कुंपण व मुख्य गेट तोडले. यानंतर घराचे कुलूप तोडताना जाग आल्यानंतर घरातील सदस्यांनी दाखवलेल्या सतर्कतेमुळे आणि आरडाओरड्यामुळे चोरट्यांनी पळ काढला. तीन ते चार चोरट्यांनी चारचाकी वाहनातून येऊन हे कृत्य केल्याचा अंदाज आहे. वडगाव निंबाळकर पोलिसांनी घटनास्थळी पाहणी केली.नागरिकांनी रात्रीच्या वेळी सतर्कता बाळगावी. संशयास्पद व्यक्ती वा वाहन आढळल्यास पोलिसांना कळवावे, असे आवाहन वडगाव निंबाळकरचे सहायक पोलिस निरीक्षक नागनाथ पाटील यांनी केले आहे.