पवारसाहेब : राज्याच्या राजकारणाचे आधारवड

पवारसाहेब : राज्याच्या राजकारणाचे आधारवड

- श्री. पोपटराव पानसरे, माजी सभापती, पंचायत समिती बारामती

देशाचे नेते व महाराष्ट्राच्या राजकारणाचे आधारवड आदरणीय शरदचंद्रजी पवारसाहेबांच्या संसदीय कामकाजाचा जागतिक विक्रम होत आहे. ही बाब महाराष्ट्रातील आपणा सर्वांसाठीच मोठ्या अभिमानाची गोष्ट आहे. इतका प्रदीर्घ काळ राजकारणात राहण्याचा जागतिक विक्रम साहेबांच्या नावावर होत आहे. खऱ्या अर्थाने शाहू, फुले, आंबेडकरांच्या विचारांचा वारसा सांगणारे राजकारण व समाजकारण साहेबांनी केले. साहेब महाराष्ट्राचे चार वेळा मुख्यमंत्री, तसेच देशाचे कृषिमंत्री म्हणून साहेबांचे काम जनतेच्या कायम स्मरणात राहील. आज या वयातदेखील साहेब अत्यंत उत्साहाने काम करत आहेत, हे एक आश्चर्य म्हणावे लागेल. सतत कामात राहणे, हे साहेबांचे एक वैशिष्ट्य़ आहे. राजकारण, समाजकारण, कला, क्रिडा, साहित्य, नाटक, शेती या सर्वच क्षेत्रामध्ये साहेबांच्या एवढा व्यासंगी नेता शोधूनही सापडणार नाही.
बारामती तालुक्यातील आमचा सुपे परगणा हा दुष्काळी भाग म्हणून ओळखला जातो. सुरुवातीच्या काळात दुष्काळी स्थितीत लोकांच्या हाताला काम मिळावे व त्याबदल्यात लोकांना अन्नधान्य मिळावे, यासाठी कासा योजनेच्या माध्यमातून गावागावात तलाव खोदले. सुमारे ४५ ते ५० वर्षापूर्वी खोदलेले हे तलाव आज या भागासाठी तारक ठरले आहेत. या तलावांमुळे जनावरे व माणसांच्या पिण्याचा पाण्याचा प्रश्न काही अंशी मार्गी लागला आहे.
साहेबांनी बारामती, दौंड व पुरंदर तालुक्यांच्या दुष्काळी भागासाठी वरदान ठरणाऱ्या जनाई व शिरसाई उपसा जलसिंचन योजनेचा प्रारंभ केला. आणि बघता बघता ही योजना या तीनही तालुक्यांच्या दुष्काळी भागातील गावांसाठी वरदान ठरली आहे. पावसाच्या पाण्यावर भिजणारे क्षेत्र. त्यामुळे शेतकऱ्यांचे आर्थिक जीवन सुधारण्यासाठी अडचणी येत होत्या. आता ही योजना चालू झाल्यामुळे हजारो एकर क्षेत्र ओलिताखाली आल्याने शेतकऱ्यांचे आर्थिक जीवनमान उंचावत आहे.