इंस्टाग्रामवरील ओळखीतून शिरूरमध्ये तरुणीला गंडा

शिरूर, ता. ३१ : इंस्टाग्रामवरील ओळखीतून मैत्री वाढवून फिरायला नेले, विश्वास संपादन केला आणि तब्बल दीड लाखांची सोनसाखळी घेऊन तरुण पसार झाल्याची घटना शहरातील ओमरूद्रा कॉलनीत घडली.
याप्रकरणी शुभांगी विजय काळे (वय २२, रा. ओमरूद्रा कॉलनी, शिरूर) यांनी दिलेल्या फिर्यादीवरून शिरूर पोलिसांनी पवन अंबादास सुरवसे (रा. डिसलेवाडी, ता. जामखेड जि. अहिल्यानगर) याच्याविरुद्ध गुन्हा दाखल केला.
पोलिसांनी दिलेल्या माहितीनुसार, काळे यांची दोन महिन्यांपूर्वी इंस्टाग्रामवर सुरवसे याच्याशी ओळख झाली होती. दरम्यान, गुरुवारी (ता. २४) सुरवसे याने काळे व तिच्या मित्र- मैत्रिणींना आपल्या मोटारीतून (क्र. एमएच १७ एएच ९९००) दोन दिवस लोणावळ्याला फिरायला नेले. शनिवारी (ता. २६) सकाळी शिरूरला परतल्यावर मित्र- मैत्रिणींना त्यांच्या घरी सोडल्यानंतर काळे यांना ओमरुद्रा कॉलनीत सोडण्यासाठी आला असता त्यांच्या गळ्यातील सोनसाखळी पाहून ‌तुझ्याप्रमाणे गणपतीचे पदक असलेली सोनसाखळी मलाही बनवायची आहे, असे म्हणत पाहायला म्हणून घेतली. तिच्या परवानगीने गळ्यातही घातली आणि तसाच पसार झाला. त्यानंतर काळे यांनी त्याच्याशी वारंवार संपर्क साधला. मात्र, त्याने प्रतिसाद न दिल्याने विश्वासघात झाल्याचे लक्षात येताच त्यांनी पोलिसांकडे धाव घेत फिर्याद दिली. पोलिस निरीक्षक संदेश केंजळे यांच्या मार्गदर्शनाखाली पोलिस हवालदार नाथसाहेब जगताप पुढील तपास करत आहे.