अण्णापूरला बिबट्याचा झुंजीत मृत्यूचा अंदाज

शिरूर, ता. ५ : अण्णापूर (ता. शिरूर) येथील ढग्या डोंगरालगतच्या झाडीमध्ये बुधवारी (ता. ५) सकाळी पूर्ण वाढ झालेला बिबट्या मृतावस्थेत आढळला. नर जातीच्या या बिबट्याचा प्रतिस्पर्धी बिबट्याशी झालेल्या झुंजीतून मृत्यू झाला असावा, असा प्राथमिक अंदाज आहे.
शिरूर तालुक्यात वेगवेगळ्या भागात सध्या बिबट्याने हैदोस घातला असून, बिबट्यांच्या वाढत्या संख्येने व उपद्रवाने ग्रामीण भागात भितीचे वातावरण पसरले आहे. बुधवारी शिरूर शहरापासून जवळच असलेल्या अण्णापूर गावातील ढग्या डोंगराजवळ अडीच वर्षे वयाचा बिबट्या मृतावस्थेत पडला असल्याची माहिती मिळताच वनरक्षक गणेश झिरपे, दिनेश बोरड व सर्पमित्र समीर शेख यांनी घटनास्थळी धाव घेतली. मृत बिबट्याला शिरूर येथे आणून अंत्यसंस्कार करण्यात आले. अण्णापूर व परिसरात बिबट्याचा वावर असून, बिबट्याला जेरबंद करण्यासाठी अण्णापूर व घोटीमळा येथे पिंजरा लावण्यात आला आहे.