शिरूरमध्ये पूर्ववैमनस्यातून टोळक्याची तरुणाला मारहाण

शिरूर, ता. १६ : पुणे- अहिल्यानगर महामार्गावरील बोऱ्हाडे मळ्याजवळ (ता. शिरूर) सात- आठजणांच्या टोळक्याने पाठलाग करून एका तरुणाला बेदम मारहाण केली. कोयता, तलवार आणि बंदूक नाचवीत या टोळक्याने दहशत निर्माण केल्याने परिसरात घबराट पसरली. मंगळवारी (ता. १६) दुपारी तीन ते साडेतीनच्या सुमारास झालेल्या या हल्ल्यात अजय माणिक घेगडे (वय २०, रा. राजापूर माठ, ता. श्रीगोंदे, जि. अहिल्यानगर) हा गंभीर जखमी झाला असून, त्याच्यावर शिरूर ग्रामीण रूग्णालयात प्राथमिक उपचार केले असून, पुढील उपचारासाठी त्याला ससून रूग्णालयात दाखल केले. पूर्ववैमनस्यातून हा हल्ला झाल्याचा अंदाज पोलिसांनी वर्तविला आहे.
जखमी अवस्थेतील घेगडे याने दिलेल्या माहितीनुसार, तो बोऱ्हाडे मळा परिसरातील आर. के. हॉटेलजवळ कामानिमीत्त आला असताना अतिश गव्हाणे, ओंकार शेंडगे, किरण चोरे, देवा धोसे, जितेंद्र शेंडगे, नरेंद्र शेंडगे (सर्व रा. डोंगरगण, ता. शिरूर) यांच्यासह दहा- बारा जणांनी त्याला घेरले. त्यांच्या तावडीतून सुटून तो न्हावरे फाट्याच्या दिशेने पळत सुटला असता हल्लेखोरांनी दुचाकीवरून पाठलाग करीत त्याला अडविले व लाकडी दांडके, कोयता आणि लाथाबुक्क्यांनी बेदम मारहाण केली. यावेळी हल्लेखोरांकडे कोयता, लांबडी, चॉपर व बंदूक होती.
दरम्यान, पूर्ववैमनस्यातून हा हल्ला झाला असून, जखमींवरील उपचारानंतर त्याचा जबाब घेऊन गुन्हा दाखल केला जाईल, असे शिरूरचे पोलिस निरीक्षक संदेश केंजळे यांनी सांगितले.
दरम्यान, शनिवारी (ता. १३) सायंकाळी साडेसहाच्या सुमारास शिरूरच्या बायपासवरील बाबूराव नगर परिसरात अजय घेगडे, अथर्व चौधरी, राहुल गव्हाणे यांनी संगनमत करून किरण अर्जुन चोरे (वय २१, रा. डोंगरगण, ता. शिरूर) याला लाकडी दांडक्याने बेदम मारहाण केली होती. तसेच त्यांच्या मोटारीवर (क्र. एमएच १२ वायडी ६५८२) दगडफेक करून पुढील काच फोडून नुकसान केले होते. याबाबत शिरूर पोलिस ठाण्यात गुन्हा दाखल असून, पुढील तपास पोलिस हवालदार शिवाजी बनकर करीत आहेत.