पालखी महामार्ग बाह्यवळणाचा सासवडच्या अर्थव्यवस्थेला फटका

सासवड, ता. २४ : आळंदी-पंढरपूर राष्ट्रीय महामार्गावरील पवारवाडी-सासवड बाह्यवळणामुळे यंदाच्या पालखी सोहळ्यादरम्यान सासवड शहरातील स्थानिक व्यावसायिकांना मोठा आर्थिक फटका बसला आहे. नेहमीप्रमाणे पालखी सोहळ्याच्या गर्दीचा फायदा घेणाऱ्या अनेक लहान-मोठ्या व्यावसायिकांचा धंदा यंदा मंदावल्याचे चित्र आहे. मेडिकल दुकानांपासून ते फळ विक्रेते, किराणा, भाजीपाला आणि अगदी वृत्तपत्र विक्रेत्यांपर्यंत सर्वांवर या बाह्यवळणाचा नकारात्मक परिणाम झाला आहे.
माजी नगरसेवक आणि मेडिकल व्यावसायिक नंदकुमार जगताप यांनी याबाबत चिंता व्यक्त केली. ते म्हणाले की, दरवर्षी पालखी सोहळ्याच्या दोन दिवसांत जो व्यवसाय होत होता, त्याच्या निम्मा व्यवसायही यंदा झालेला नाही. पूर्वी जेजुरी नाका ते सासवड-कोंढवा मार्गावरील हिवरे गावापर्यंत दिंड्या थांबत असत आणि त्यांच्या राहुट्या पडत होत्या. त्यामुळे या भागातील व्यावसायिकांना मोठा फायदा होत असे. मात्र, यंदा बाह्यवळणाचे काम पूर्ण झाल्याने दिंड्या जेजुरी मार्गावरील खळद-गोटेमाळ परिसरात गेल्या आहेत. यामुळे सासवड शहरातील मुख्य बाजारपेठेत येणाऱ्या भाविकांची संख्या मोठ्या प्रमाणात घटली आहे.
याचा परिणाम केवळ मेडिकल व्यावसायिकांवरच नव्हे, तर इतर क्षेत्रांवरही झाला आहे.
सासवड येथील वृत्तपत्र विक्रेते शकील बागवान आणि देविदास सातव यांनी सांगितले की, बाह्यवळणामुळे वृत्तपत्र व्यवसायालाही फटका बसला आहे, कारण अनेक दिंड्या शहरातील मार्गातून न जाता बाह्यवळणाने गेल्याने त्यांची विक्री घटली आहे. माजी नगरसेवक आणि फळ विक्रेते हारून बागवान यांनीही यावर दुजोरा दिला. त्यांच्या माहितीनुसार, सासवड शहरातील किराणा दुकानदार, हॉटेल व्यावसायिक तसेच फळ आणि भाजी विक्रेते या सर्वांनाच पालखी सोहळ्यामुळे मिळणाऱ्या अपेक्षित व्यवसायापासून वंचित राहावे लागले आहे. या बाह्यवळणाने प्रवासाचा वेळ वाचला असला तरी, अनेक वर्षांपासून पालखी सोहळ्यावर अवलंबून असलेल्या सासवडच्या स्थानिक अर्थव्यवस्थेवर मात्र त्याचा विपरीत परिणाम झाल्याचे स्पष्ट झाले आहे.