पुरंदरमध्ये पालखी महामार्गवर बेशिस्तपणा

सासवड, ता. १ : आळंदी-पंढरपूर राष्ट्रीय महामार्ग ९६५ वरील हडपसर-सासवड मार्गावर दिवे घाटापासून पुढील रस्त्यावर बेशिस्त हॉटेल व्यावसायिकांमुळे प्रवाशांच्या जीवावर बेतण्याचा धोका निर्माण झाला आहे. हॉटेल्सचे बोर्ड, बॅनर आणि जाहिरातींनी रस्ता दुभाजक तसेच दिशादर्शक फलक पूर्णपणे व्यापले आहेत. अनेक ठिकाणी मुख्य मार्ग आणि सेवा मार्ग यामध्ये वाहने ये-जा करण्यासाठी जागा ठेवली असल्याने यामुळे वाहतुकीला अडथळा होत असून अपघाताची शक्यता वाढली आहे.
पुणे-नाशिक महामार्गावर अशा प्रकारच्या जाहिरातींमुळे अपघात झाल्याच्या घटना घडल्या आहेत. या समस्येकडे प्रशासनाने तातडीने लक्ष देऊन कठोर कारवाईची मागणी स्थानिक आणि प्रवाशांकडून होत आहे. प्रवाशांच्या सुरक्षिततेसाठी अशा बेकायदेशीर कृत्यांवर तत्काळ आळा घालणे आवश्यक आहे.
याबाबत या महामार्गाचे काम करणाऱ्या टी अॅण्ड टी कंपनीचे प्रकल्प व्यवस्थापक राजेंद्र ढगे यांच्याशी संपर्क साधला असता, दुभाजक तसेच महामार्गावरील दिव्यांच्या खांबावरील हॉटेलचे बोर्ड आम्ही अनेकदा काढले होते. मात्र दुसऱ्या दिवशी पुन्हा ते लावले जातात. या संदर्भात हॉटेल व्यावसायिकांना नोटीस बजावण्यात आल्या आहेत.
मुख्य रस्ता आणि सेवा रस्ता यामध्ये सध्या अनेक ठिकाणी असलेल्या ये-जा करण्यासाठी असलेल्या जागा बंद करण्यात येणार आहेत. ग्रामस्थ आणि व्यावसायिकांबरोबर या बाबत बैठका झाल्या असून ग्रामस्थांच्या सूचनेप्रमाणे गावच्या ठिकाणी किंवा सर्वांना सोईस्कर अशा, एक किलोमीटर अंतरावर एकाच ठिकाणी ये-जा करण्यासाठी रस्ता ठेवणार आहे. इतर ठिकाणी लोखंडी ग्रील लावून रस्ता बंद करण्यात येणार असल्याचे ढगे यांनी सांगितले.

अतिक्रमणाची स्थिती :
या मार्गावरील झेंडेवाडी बस थांबा, काळेवाडी, ढुमेवाडी, दिवे येथील हायस्कूल, पवारवाडी आदी ठिकाणच्या बहुतेक हॉटेल व्यावसायिकांनी दुभाजकातच हॉटेलच्या जाहिरातींचे बोर्ड लावले आहेत. काहींनी तर महामार्गाच्या दिशादर्शक बोर्डांवरच हॉटेल्सचे बोर्ड लावल्याने प्रवाशांची दिशाभूल होत आहे.

इतर समस्या:
- मुख्य मार्ग आणि सेवा मार्ग यामध्ये अनेक ठिकाणी वाहने ये-जा करण्यासाठी जागा ठेवली आहे.
- महामार्गावरील दिव्यांचे खांब आणि दिशादर्शक फलक बॅनरच्या विळख्यात आहेत.
- अनेक ठिकाणी बॅनर आणि बोर्ड तुटून रस्त्यावर पडले आहेत. यामुळे रस्ता अस्वच्छ झाला असून अपघातांना निमंत्रण मिळत आहे.