कऱ्हा, चांबळी नद्यांना पाणी

सासवड, ता. १५ : पुरंदर तालुक्यासह सासवड परिसरात रविवारी (ता. १४) रात्रभर संततधार पावसाने हजेरी लावली. यामुळे वातावरणात गारवा निर्माण झाला आहे. पुरंदरच्या पश्चिम भागात झालेल्या पावसामुळे कऱ्हा व चांबळी नदीला पाणी आले आहे.
रविवारी रात्रीपासूनच सोमवारी दुपारी १२ पर्यंत सासवडमध्ये २९ मि.मी. पाऊस पडला. तर १ जूनपासून १५ सप्टेंबरपर्यंत ३३५ मिमी पावसाची नोंद झाल्याची माहिती सासवड येथील आचार्य अत्रे वेधशाळेचे व्यवस्थापक नितीन यादव यांनी दिली. याबरोबरच जेजुरी मंडलमध्ये ३८ मि.मी., वाल्हे मंडलमध्ये ६१ मि.मी., भिवडी मंडलमध्ये ५२ मि.मी., परिंचे मंडलमध्ये ५६ मि.मी. पावसाची नोंद झाली. या पावसामुळे बाजरी, सोयाबीन, भुईमूग, फळबागा, ऊस, आदी सर्वच पिकांना फायदा झाला आहे.