‘पुरंदरच्या मातीतून’ संग्रह कौतुकास्पद : चांदगुडे

सासवड, ता. २५ : ‘‘पुरंदर तालुक्यातील आठ कवींनी एकत्र येत तयार केलेला ‘पुरंदरच्या मातीतून’ हा कविता संग्रह ही कौतुकास्पद बाब असून, ती एक वैचारिक श्रीमंती आहे,’’ असे मत कवी हनुमंत चांदगुडे यांनी व्यक्त केले.
सासवड (ता. पुरंदर) येथील वाघिरे महाविद्यालयात आयोजित या काव्यसंग्रहाच्या प्रकाशन सोहळ्यात चांदगुडे बोलत होते. उपप्राचार्य संजय झगडे यांच्या अध्यक्षतेखाली कार्यक्रम पार पडला. राजगृह प्रकाशनाने प्रकाशित आणि प्राजक्ता धुमाळ यांनी संपादित केलेल्या या संग्रहात प्रशांत बोरावके, ऋषिकेश जगताप, राजेंद्र सोनवणे, निखिल गुरव, गणेश फुले, श्रीकांत लक्ष्मीशंकर आणि अजहर नदाफ यांच्या कवितांचा समावेश आहे. सामाजिक कार्यकर्त्या लक्ष्मी यादव यांनी या संग्रहाला प्रस्तावना लिहिली आहे.
यावेळी ज्येष्ठ कवयित्री कल्पना दुधाळ यांनी संग्रहातील कवितांवर भाष्य, तर संजय झगडे मनोगतातून कविता संग्रहाचे कौतुक केले. धुमाळ यांनी पुस्तकाची संकल्पना स्पष्ट केली. याप्रसंगी संतोष जगताप, नीता सुभागडे, अनुराधा जगताप, संजय काटकर, अनिल कदम, मोहन बागडे, संदीप इनामके, अमोल बागडे, रेश्मा कामठे, गणेश बागडे, देवा भालेराव, अमोल बेलसरे आदी उपस्थित होते. पूर्वाराणी जगताप यांनी सूत्रसंचालन केले.