सासवडमध्ये सोपानकाका महाराजांच्या मंदिरात कीर्तन

सासवड, ता. २ : हरिनामाचा जयघोष आणि टाळ-मृदंगाच्या गजरात सासवड येथील संत सोपानकाका महाराजांच्या समाधी मंदिरात कार्तिक एकादशीचा उत्सव साजरा करण्यात आला. मंदिरात फुलांची सजावट तर विद्युत रोषणाईने भाविकांचे लक्ष वेधून घेतले. पहाटेपासूनच भाविकांनी दर्शनासाठी गर्दी केली होती.
पहाटे काकडा, भजन आणि विधिवत महापूजेनंतर दिवसभर हरिपाठ, प्रवचन आणि कीर्तनाचे आयोजन केले होते. राजेंद्र महाजन यांनी वारकरी, भाविकांना उपवासानिमित्त फराळ वाटप कला. रात्री ८ ते १० या वेळेत स्वप्नील महाराज काळाणे यांचे कीर्तन होऊन त्यानंतर रात्रभर संगीत भजनाचा जागर रंगला.
सोपानकाका महाराजांचा जन्मोत्सव ​५ नोव्हेंबरला
​त्रिपुरारी पौर्णिमेच्या दिवशी, म्हणजेच बुधवारी (ता. ५) मंदिरात संत सोपानकाका महाराजांचा जन्मोत्सव साजरा करण्यात येणार आहे. यानिमित्त सकाळी ९ ते ११ या वेळात पुणे येथील संदीप महाराज वैद्य यांचे जन्मोत्सवाचे कीर्तन होईल. यानंतर पुष्पवृष्टी आणि आरतीनंतर भिवडी ग्रामस्थांच्या वतीने महाप्रसाद होईल. सायंकाळी ५ ते ८ या वेळेत संत सोपानकाका सहकारी बँकेच्या वतीने हजारो पणत्या लावून दीपोत्सव साजरा करण्यात येणार असल्याची माहिती मुख्य विश्‍वस्त त्रिगुण महाराज गोसावी आणि व्यवस्थापक हिरुकाका गोसावी यांनी दिली.