तहसीलचे कामकाज सासवडमध्ये बंद

​सासवड, ता. १६ : हिवाळी अधिवेशनादरम्यान राज्यातील महसूल विभागाच्या १० अधिकाऱ्यांचे केलेले निलंबन अन्यायकारक असल्याचा दावा करत महाराष्ट्र राज्य महसूल कर्मचारी संघटनेच्या हाकेला प्रतिसाद देत पुरंदर तालुक्यातील महसूल कर्मचाऱ्यांनी सोमवारपासून बेमुदत संप पुकारला आहे. मंगळवारी सलग दुसऱ्या दिवशीही कर्मचारी संपात सहभागी झाल्याने तहसील कार्यालयाचे कामकाज बंद होते.
या संपात तहसीलदारांपासून ते शिपाई संघटना, अशा सर्वच घटकांनी सहभाग घेतला आहे. निलंबन मागे घेतल्याशिवाय कामावर रुजू न होण्याचा पवित्रा या संघटनांनी घेतला आहे. महसूल विभागात विविध दाखले, जमिनींचे खटले आणि इतर शासकीय कामांसाठी येणाऱ्या विद्यार्थी, महिला व शेतकऱ्यांना रिकाम्या हाती परतावे लागत असल्याचे चित्र सासवडच्या प्रशासकीय इमारतीत पाहायला मिळत आहे. त्यामुळे नागरिकांत तीव्र नाराजी आहे. ‘सातबारा दुरुस्तीसाठी वर्षभरापासून मंत्रालयापर्यंत पाठपुरावा करत आहे. दोन महिन्यांपासून निकाल प्रलंबित आहे. आज संपामुळे पुन्हा माघारी जावे लागत आहे. शासनाने ‘लाडकी बहीण’ योजनेपेक्षा आमची अशी कामे वेळेत पूर्ण करण्याकडे लक्ष द्यावे,’ अशी मागणी जेजुरीतील राजश्री खोमणे यांनी केली.