​सासवडला मतमोजणीसाठी ११ प्रभागांसाठी ११ टेबल

सासवड, ता. १९ : सासवड (ता. पुरंदर) नगरपरिषदेच्या सार्वत्रिक निवडणुकीची रविवारी (ता. २१) होणारी मतमोजणी सुरळीत पार पाडण्यासाठी प्रशासकीय व्यवस्था सज्ज असल्याची माहिती निवडणूक निर्णय अधिकारी सतीश थेटे आणि सहाय्यक निवडणूक अधिकारी डॉ. कैलास चव्हाण यांनी दिली. सर्व उमेदवार आणि कार्यकर्त्यांनी शांतता व सुव्यवस्था राखण्याचे आवाहन केले आहे.
नगराध्यक्षपदासह ११ प्रभागांमधील २० नगरसेवकपदांसाठी ४५ उमेदवार रिंगणात होते. २ डिसेंबर रोजी उत्साहात मतदान पार पडले होते. प्रभाग क्र. चार बची जागा आधीच बिनविरोध झाली आहे. तर प्रभाग क्र. ११ अ ही जागा न्यायप्रविष्ट आहे. सासवड नगरपरिषदेच्या सभागृहात रविवारी सकाळी १०पासून मतमोजणीला सुरुवात होणार आहे. मतमोजणीसाठी ११ प्रभागांसाठी ११ टेबलांची व्यवस्था केली आहे. प्रत्येक टेबलवर दोन कर्मचारी व शिपाई, तसेच प्रत्येक टेबलवर आणखी दोन राखीव कर्मचाऱ्यांची व्यवस्था केली असून, ही प्रक्रिया एकूण चार फेऱ्यांमध्ये पूर्ण केली जाईल. मतमोजणीच्या नियमावली आणि प्रक्रियेबाबत निवडणूक निर्णय अधिकारी यांच्याकडून सर्व संबंधित उमेदवारांना सूचना पत्रके देण्यात आली आहेत.