तळेगाव ढमढेरेमध्ये शिवमहापुराण कथेची सांगता

तळेगाव ढमढेरे, ता. २१ : तळेगाव ढमढेरे (ता. शिरूर) येथे गेल्या आठवडाभरापासून सुरू असलेल्या ‘शिव महापुराण कथेचा’ समारोप उत्साहात झाला. कथेचे आयोजन माजी उपसरपंच ॲड. गणेश तोडकर, सहकारी मित्र व ग्रामस्थ यांच्यातर्फे करण्यात आले होते. कथा ऐकण्यासाठी तळेगाव ढमढेरे पंचक्रोशीसह शिरूर येथून मान्यवर, बाल गोपाळ, महिला, ज्येष्ठ नागरिकांची हजेरी होती.
श्री रामकृष्ण परमहंस सेवा प्रतिष्ठान बीड येथील समाधान महाराज शर्मा यांनी आपल्या सुश्राव्य वाणीतून शिव महापुराण कथा विविध उदाहरणे देऊन सांगितली. तत्पूर्वी पहिल्या दिवशी समाधान महाराज शर्मा यांची सजवलेल्या रथातून बाजारपेठेतून कार्यक्रम स्थळापर्यंत मिरवणूक काढण्यात आली होती. यामध्ये शेकडो युवक महिला, नागरिक आणि ग्रामस्थ सहभागी झाले होते.
शिवपुराण महात्म्य विद्धेश्‍वर संहिता, रुद्र संहिता सती पार्वती खंड शिव-पार्वती विवाह, रुद्र संहिता कुमार खंड गणेश कार्तिकेय चरित्र, रुद्र संहिता युद्ध खंड अर्धनारी नटेश्‍वर नंदी वर्णन, उमा व कैलाश संहिता, बारा ज्योतिर्लिंग महात्म्य, शिवमानस पूजाविधी पंचक्षरमंत्र महिमा कथा आदी शिवमहापुराण कथा विविध उदाहरणे देऊन शर्मा महाराजांनी प्रेक्षकांना सांगितल्या.
कथा संपल्यानंतर दररोज सर्व उपस्थितांना महाप्रसाद देण्यात आला. माजी उपसरपंच ॲड. गणेश तोडकर, श्री दत्त सेवेकरी मंडळ, श्री संत सावता माळी प्रासादिक दिंडी सोहळा व ग्रामस्थांनी संयोजन करून कथेचा समारोप केला. मान्यवरांच्या हस्ते दररोज आरती करण्यात आली. ॲड. तोडकर यांनी राबवलेल्या शिव महापुराण कथेचे शिरूर तालुक्यासह पुणे जिल्ह्यातील मान्यवरांनी व ग्रामस्थांनी कौतुक केले.