हुमणीचा प्रादुर्भाव रोखण्यासाठी प्रशिक्षण

तळेगाव ढमढेरे, ता.२८ : तळेगाव ढमढेरे (ता. शिरूर) येथे हुमणी किडीचा प्रादुर्भाव रोखण्यासाठी शेतकऱ्यांचा एकदिवसीय प्रशिक्षण वर्ग घेण्यात आला. कृषी विभाग, आत्मा पुणे व तळेगाव ढमढेरे येथील शेतकरी उत्पादक कंपनी यांच्या संयुक्त विद्यमाने शेतकऱ्यांना प्रशिक्षण वर्गाचे आयोजन करण्यात आले होते.यावेळी परिसरातील शेतकरी उपस्थित होते.

तळेगाव ढमढेरे परिसरातील उसाच्या क्षेत्रात हुमणी अळीचा प्रादुर्भाव मोठ्या प्रमाणात दिसून येत असल्याने हुमणी ही बहुभक्षी कीड उपद्रवी ठरत आहे. त्यामुळे उसाच्या उत्पादनात घट होत आहे. किडीच्या नियंत्रणासाठी जैविक कीडनाशक हा पर्यावरण पूरक शाश्‍वत पर्याय पिकांना वाचविण्यासाठी वरदान ठरणार असल्याचे मत नारायणगाव येथील कृषी विज्ञान केंद्राचे शास्त्रज्ञ डॉ. दत्तात्रय गावडे यांनी व्यक्त केले.
तालुका कृषी अधिकारी सुवर्णा आदक यांनी शासनाच्या विविध योजनांची माहिती देऊन येथील शेतकरी उत्पादक कंपनीने शेतकऱ्यांसाठी राबविलेल्या विविध उपक्रमाचे विशेष कौतुक केले.
ऊस व्यवस्थापन, हुमणी नियंत्रण व सेंद्रिय शेती संकल्पना या विषयावर आकाश सावंत यांनी शाश्वत शेतीसाठी १० ड्रम युनिटचे महत्त्व सांगत कमी खर्चात अधिक उत्पादन वाढविण्याचा फॉर्मुला सविस्तर सांगितला.
आपल्या भागात जास्तीत जास्त फळबाग लागवड करून त्याचे संवर्धन करण्याचे आवाहन करून शासनाच्या विविध योजनांचा शेतकऱ्यांनी फायदा घ्यावा असे कृषी सहाय्यक अशोक जाधव, विवेकानंद लभाने व प्रशांत दोरगे यांनी सांगितले.
सुधीर गायकवाड यांनी प्रास्ताविक तर घनश्याम तोडकर यांनी सूत्रसंचालन केले. गोपाळ भुजबळ यांनी आभार मानले.