तळेगाव ढमढेरेत सोमवारी रंगणार दहीहंडी

तळेगाव ढमढेरे, ता.१६ : तळेगाव ढमढेरे (ता. शिरूर) परिसरात विविध मंडळातर्फे दहीहंडी उत्सव साजरा होत आहे. दहीहंडी फोडण्यासाठी अनेक मंडळांनी रोख रक्कम व विविध बक्षिसांची खैरात केली आहे.
राहुलदादा करपे पाटील सोशल फाउंडेशनतर्फे सोमवारी (ता.१७) सायंकाळी सहा वाजता भव्य दहीहंडी उत्सव साजरा होत आहे. त्यासाठी राष्ट्रवादी काँग्रेस शरदचंद्र पवार पक्षाचे प्रदेशाध्यक्ष शशिकांत शिंदे, माजी आमदार ॲड. अशोक पवार, नृत्यांगना हिंदवी पाटील आणि अभिनेत्री गायत्री दातार प्रमुख पाहुणे म्हणून उपस्थित राहणार आहेत. या दहीहंडी उत्सवासाठी राहुल करपे यांच्यातर्फे ३ लाख ३३ हजार ३३३ रुपयांचे बक्षीस ठेवण्यात आले आहे. ही दहीहंडी तरुणांचे आकर्षण बनली आहे. अनेक मंडळांनी दहीहंडी फोडण्यासाठी नाव नोंदणी केली असल्याचे उद्योजक राहुल करपे यांनी सांगितले. येथील प्रशस्त जागेत हा दहीहंडी उत्सव होणार आहे. या उत्सवासाठी असलेल्या जागेचे भूमिपूजन शेकडो तरुणांच्या उपस्थितीत करण्यात आले.