तळेगाव ढमढेरे येथे बिबट्याचा वावर

तळेगाव ढमढेरे, ता. ९ : तळेगाव ढमढेरे (ता. शिरूर) येथील शेतकरी रामदास ढमढेरे यांच्या शेतात सोमवारी (ता. ८) सायंकाळच्या दरम्यान बिबट्याचे दर्शन झाले. येथील शेतकरी संदीप ढमढेरे, किरण ढमढेरे, जगदीश ढमढेरे व इतर स्थानिकांना बिबट्याचे वारंवार दर्शन झाले आहे.
येथील बिबट्याच्या दर्शनाने शेतकरी भयभीत झाले असून, रात्रीच्या वेळी शेतात जाणे कठीण झाले आहे. येथील ढमढेरे वस्ती, मुळे वस्ती, साळूमाळू वस्ती आदी परिसरात बिबट्याचा वावर वाढला आहे. परिसरात उसाचे प्रमाण जास्त असल्याने तेथे बिबट्या वास्तव्य करीत आहे. शेतकरी, लहान मुले यांना बिबट्यापासून भीती आहे. पाळीव कुत्र्यावर बिबट्या झडप मारत आहे. वनविभागाने या परिसराची पाहणी करून बिबट्याला प्रतिबंध करण्यासाठी पिंजरा लावावा, अशी मागणी ग्रामस्थांनी केली आहे. या संदर्भात वनविभागाला पत्र व्यवहार करणार असल्याचे सरपंच दीपाली ढमढेरे व ग्रामविकास अधिकारी राजेंद्र सात्रस यांनी सांगितले.